Гадаад харилцааны яамнаас тусгай үүргийн нислэгээр ирэх иргэдийн тийзний үнийн хөнгөлөлт болон коронавирусийн эсрэг вакцины татан авалтын талаар мэдээллээ.

Энэ үеэр Гадаад харилцааны сайд Б.Батцэцэг “Хилийн чанадаас нутаг буцах хүсэлтээ илэрхийлсэн иргэдийг яаралтай татан авах ажлын хүрээнд тусгаарлалтын хоногийг багасгах, нислэгийн хуваарийг 1-2 сарын өмнө зарлах,  тийзний үнийг бууруулахаар ажиллаж байна. Шадар сайдын 2021 оны 20 дугаар тушаалаар хоёрдугаар сарын 19-ны өдрөөс эхлэн эх орондоо ирсэн иргэдийг 10 хоног тусгаарлаж, үлдсэн дөрөв хоногийг гэрийн ажиглалтад байлгах журам хэрэгжиж эхэлсэн.

Гэрийн ажиглалтад байхдаа “Clicks GPS” гэдэг аппликэйшнийг утсандаа суулгана. Ингэснээр иргэдээ хянах юм.

Ингэснээр нислэгийн тоо сард 8-14 болж нэмэгдэж, 2000 гаруй иргэнийг эх орондоо ирэх боломж бүрдүүлж байгаа. Ерөнхий сайдаас өгсөн үүргийн дагуу гадаадаас ирж буй иргэдийн хүсэлтээр тусгаарлах байрыг өөрсдийнх нь сонголтоор олгоно. Өнөөдрийн байдлаар нутаг буцах хүсэлтээ илэрхийлсэн 9411 иргэн байна. Гадаадаас ирэх иргэдийн дийлэнхийг тавдугаар сарын 1 гэхэд эх оронд нь ирүүлсэн байхаар ажиллаж байна” гэв.