ХӨСҮТ-ийн Тандалт, судалгааны албаны дарга А.Амбасэлмаа коронавирусийн халдварын голомтын талаар мэдээлэл өглөө.

Тэрбээр "Одоогийн байдлаар шинэ голомт үүсээгүй байна. Коронавируст халдварын нууц үе 14 хоног байна. Монголд халдварын нууц үе 5-7 хоногт илэрч байна. Шинээр үүссэн голомтод хоёроос дээш тохиолдол илэрвэл голомт гэж үздэг. Баянзүрх дүүргийн нэгдсэн эмнэлгийн класстер голомтыг хяналтад авч, голомтын хариу арга хэмжээ үр дүнтэй болсон. Баянзүрх дүүргийн эмнэлэгтэй холбоотой эмнэлгийн 30 гаруй ажилчид халдварт өртсөн. Тус эмнэлгийн голомтоос нийт 329 иргэн халдвар авсан. Халдвар гэр бүл, хамт олон, нэгдсэн арга хэмжээнд оролцогчид, байрны орц зэргээр тархаж байна. Тусгаарлах байранд ажиглан, тусгаарласан иргэдийн хоёр, гурав дахь шинжилгээний хариугаас халдвар илэрч байна. Хавдар судлалын үндэсний төвтэй холбоотой таван хүн, тэдгээрийн гэр бүлийн хавьталтай нийлээд 17 тохиолдол бүртгэгдсэн. Тус голомтоос үргэлжилсэн халдвар сүүлийн хоногт илрээгүй. Харин “Ачтан-Элит клиник” эмнэлгийн голомтоос 21, бусад гэр бүлийн болон орцны хавьтлаар халдварласан  26 тохиолдол бүртгэгдэж, нийт 47 иргэнээс халдвар илэрсэн. Харин “Мөнххада” компанийн найман ажилтан өвдсөн. Үүнтэй холбоотой гэр бүлийн ойрын хавьтал нэмэгдэж 25 хүн халдвар авсан. Мөн “Тэнүүн-Огоо” компанийн ажилчид нийлж салхинд гарснаас болж арав гаруй хүн халдвар авсан. Гэр бүлийн болон ойрын хавьтал нийтдээ 20 гаруй хүнээс халдвар илэрсэн” гэлээ.