Эрүүл мэндийн яамнаас коронавируст цар тахлын тархалтын талаарх ээлжит мэдээллээ хийлээ. Энэ үеэр ХӨСҮТ-ийн тандалт, судалгааны албаны дарга А.Амбасэлмаа “Өнгөрсөн 24 цагийн хугацаанд 15849 хүнээс шинжилгээ авахад 14 хүнээс халдвар илэрсэн. Баянзүрх дүүргийн 17 хорооны гэр бүлийн есөн хүн, Баянгол дүүргийн VI хорооны гэр бүлийн хавьтал, ИНЕГ-ын ажилтны ойрын хавьтлаас халдвар илэрсэн. Ингээд Улаанбаатар хотод 630 тохиолдол батлагдлаа. Өнгөрсөн хоногт бусад аймагт халдвар бүртгэгдээгүй. Сэлэнгэ аймагт бүртгэгдсэн долоон хүн эдгэрч, эмнэлгээс гарсан. Сэлэнгэ аймгийн эмнэлэгт халдвартай хүн байхгүй. Манай улсын хэмжээнд 1456 хүн халдвар авснаас 909 хүн эдгэрлээ” гэв.