ЭМЯ-наас “Ковид-19” тархалттай холбоотойгоор 18:00 цагаас ээлжит мэдээлэл хийлээ. Энэ үеэр ХӨСҮТ-ийн дэд захирал Д.Наранзул  “Халдвар авсан залуучууд хөнгөн хэлбэрээр өвчилж байна. Харин 50-аас дээш насныханд халдвар хүнд тусаж байна. Өнгөрсөн хугацаанд “Ковид-19” халдварт өвчинд хийсэн судалгааг харахад хуурай ханиалгах, толгой өвдөх, хамар битүүрэх, халуурах шинж тэмдэг түгээмэл илэрч байна. Эдгээр шинж тэмдэг илэрвэл яаран эмнэлэгт очихгүйгээр өөрийгөө гэртээ тусгаарлаж, 119 дугаарын утсанд хандаж зөвлөгөө, мэдээлэл аваарай” гэсэн юм.  

Харин УОК-ын Шуурхай штабын дарга, хурандаа Б.Ууганбаяр “Өнгөрсөн сарын 30-ны өдөр УОК-ын  шуурхай штаб хуралдаж, оны эцсийн ажил үүргээ ярилсан. Хурлын дараа  зарим ажилчдаа шагнаж, урамшуулсан. Харин шинэ жилийн арга хэмжээ зохион байгуулаагүй. Өчигдөр ХӨСҮТ-ийн өгсөн заавар зөвлөмжийн дагуу 18:00-02:00 цаг хүртэл “Ачтан-Элит клиник”  эмнэлгийг тусгаарласан. УОК-ын шуурай штаб ХӨСҮТ-өөс өгсөн зааврын дагуу ажиллаж байгаа. Мөн ажлын хэсэгтэй хамтран эрүүл мэндийн байгууллага, цагдаа, онцгой комиссын алба хаагчид ажиллаж байна” гэлээ.