Эрүүл мэндийн яамнаас коронавирусийн тархалтын талаарх ээлжит мэдээллээ хийлээ. Энэ үеэр ХӨСҮТ-ийн Тандалт, судалгааны албаны дарга А.Амбасэлмаа “Өнгөрсөн 24 цагийн байдлаар улсын хэмжээнд 11581 хүн коронавирусийн тандалт, илрүүлэг шинжилгээнд хамрагдлаа. ПСР шинжилгээний хариугаар 22 хүнээс халдвар илэрсэн. Халдварын шинэ тохиолдлууд Баянзүрх нэгдсэн эмнэлгийн голомттой холбоотой.  Өвчилсөн сувилагчийн гэр бүлийн  дөрвөн гишүүн, сүүлд бүртгэгдсэн голомтуудын ойрын хавьтал болох тусгаарлагдсан хүмүүсийн анхны болон хоёр, гурав дахь шинжилгээнд вирус илэрлээ. Ингэснээр Улаанбаатар хотод батлагдсан тохиолдол 491 боллоо. Энэ хугацаанд орон нутагт нэмж халдвар бүртгэгдээгүй. Ингээд улсын хэмжээнд нийт 1308, дотоодын нийт халдвар 817 болсон” гэлээ.