Засгийн газрын ээлжит бус хуралдааны шийдвэрийг Шадар сайд Я.Содбаатар танилцуулж байна. Хуралдааны үеэр нэмэлт тайлбар, мэдээлэл өгсөн юм. Тэрбээр "Засгийн газар төлөвлөгөөний дагуу ажиллаж байна. Өдрийн орлогоороо түрээсээ төлж, зээлээ төлдөг олон иргэн байгаа. Цахилгаан, дулаан, уур, ус, хогны мөнгийг улсаас төлж,  иргэдийн амьжиргааг дэмжихээр ажиллаж байна. Манайх баян улс биш.Эдийн засгийн арга хэмжээг тодорхой хязгаартай хийх хэрэгтэй. Өвчний тархалтын улмаас дэлхийн олон орон гаргасан шийдвэрээ эргэн харж хариу арга хэмжээ авч байна. Манай улсад халдвар голомтлон гарч байгаа. Харин халдвар алаг цоог хэлбэр рүү  шилжиж, нийтийг хамарсан  цар тахал дэгдвэл  Европын орнууд шиг эрүүл мэндийн байгууллага хүнээ эмчилж дийлэхгүй болно. Одоохондоо Монгол Улс харьцангүй гайгүй байна. Эрүүл мэндийн байгууллага өвчтөнөө авч дийлэхээ байхаар гэрт нь эмчлэх арга хэмжээ авдаг. Байдал хүндэрвэл дүүрэг, аймгийн эмнэлгүүдэд иргэдийг  эмчилнэ. Мэргэжлийн эрдэмтдийн тооцооллын үндэслэл дээр тулгуурлаж, харуул хамгаалалт, цагдаа гарган ажиллуулах зэрэг төрийн нууцтай холбоотой арга хэмжээнүүд  байдаг. Аливаа шийдвэрийг санаанаасаа зохиож гаргасан зүйл байхгүй. Олон талын үзүүлэлт, нөхцөл байдлыг судалж шийдвэр гаргаж байна. Засгийн газрын шийдвэрийн 80 хувь нь мэргэжлийн хүмүүсийн зөвлөмжөөр гаргасан. Нэг ч болтугай иргэн халдварын эрсдэлээс сэргийлж, өөрийгөөө хамгаалаасай гэж хүсэж байна" гэлээ.