“Цэс Хайрхан” ХХК-ийн шинэ жилийн баярт зориулан “Luxurious” гэх оргилуун дарсыг дотооддоо үйлдвэрлэсэн бөгөөд долоон мянган төгрөгөөр худалдаанд гаргажээ. Гэтэл гаднах шошго наалтыг хуулж авахад дотроос нь “Советское” нэртэй ОХУ-аас импортлон оруулж ирдэг оргилуун дарсны шошго гарсан бичлэг “Facebook” хуудсаар цацагдсан билээ.

Энэ зөрчлийг хэрхэн шийдвэрлэх талаар ШӨХТГ-ын Хэвлэл мэдээллийн ажилтан Ц.Үүрцайхаас  тодруулахад “Цэс хайрхан” компанийн захирал “Бид ямар нэгэн байдлаар хэрэглэгчдийг  хуураагүй.  Цар тахлын улмаас шилний хүрэлцээ, нөөц муу, хурдан хугацаанд эргэлтэд оруулах боломжгүй байсан учир хуучин шил ашигласан” гэх тайлбар өгсөн юм. Мөн ШӨХТГ-аас “Luxurious”, “Советское” хоёр оргилуун дарсанд шинжилгээ хийлгэхээр  шинжилгээний лабораторид өгчээ. Тус зөрчлийг шалгуулахаар хоёр байцаагч тусгайлан гаргасан гэлээ. Түүнчлэн ШӨХТГ-аас хэрэглэгч бүрийн  гомдлыг барагдуулах ёстой гэдэг шаардлага тавьсан. Хэрвээ өөр шил ашиглах шаардлагатай байсан бол хэрэглэгчдэд хүрэхээс өмнө  урьдчилан мэдээлэл, тайлбар хийх ёстой байсан” гэлээ.  

Харин  “Цэс хайрхан” компанийн удирдлагын зүгээс дотоод хяналт шалгалт хийлгүй хариуцлага алдаж, арванхоёрдугаар сарын 11-нд үйлдвэрлэлд хэрэглэсэн хуучин шилэн лонхны лазераар шивэгдсэн он сарыг  арилгалгүй давхар шошготой бүтээгдэхүүнийг хэрэглэгч, харилцагчдадаа нийлүүлсэндээ уучлалт хүслээ. Дээрх гарсан асуудалтай холбогдуулан үйлдвэрлэлийн үйл ажиллагаагаа бүрэн зогсоосон. Холбогдох мэргэжлийн байгууллагуудын зүгээс хэрэгжүүлэх аливаа шийдвэр, арга хэмжээг дагаж мөрдөнө. Мөн арванхоёрдугаар сарын 11,12-ны өдрийн бүтээгдэхүүнийг худалдан авсан хэрэглэгч, харилцагч бүрийн гомдлыг барагдуулах болно гэжээ.