Алтанбулаг боомтоор эм, эмнэлгийн тоног төхөөрөмж, хүнсний бүтээгдэхүүн зөөвөрлөсөн 23 тээврийн хэрэгслийг нэвтрүүлж байна

2021-01-03, 622

Улсын онцгой комиссын даргын тушаалаар ОХУ-ын Хиагт боомтод ирээд байгаа олон улсын ачаа тээврийн авто машины чирэгч, чиргүүлийг хилийн Алтанбулаг боомт дээр солилцож, туршилтын татан авалт зохион байгуулах үүрэг бүхий Шуурхай бүлгийг Зам, тээврийн хөгжлийн яамны Төрийн нарийн бичгийн дарга С.Батболдоор ахлуулан байгуулсан билээ.

Алтанбулаг боомтоор нэвтрэх ачаа тээврийн хөдөлгөөний зохион байгуулалтад өөрчлөлт оруулж, гадны тээврийн хэрэгслийг хилээр нэвтрүүлж чирэгч болон хагас чиргүүлийг сольж, туршилтын журмаар ачааг татан авах, хагас чиргүүлээ үлдээсэн гадны жолооч нарыг хагас чиргүүл буцаж ирэх хүртэл хугацаанд ОХУ руу түр хугацаанд буцаан гаргах, дотоодод хийх монгол жолооч нарын тээвэрлэлтийг цагдаагийн хяналтад зорчуулж, тээвэрлэлт дууссаны дараа жолооч нарыг 7 хоногийн хугацаанд гэрт нь тусгаарлах арга хэмжээг авах зорилготой тус бүлэг Алтанбулаг боомтод ажлаа эхлүүллээ.

Өячигдөр тус боомтоор олон улсын 23 тээврийн хэрэгсэл оруулж ирэхээр төлөвлөсөн бөгөөд эхний тээврийн хэрэгсэл орж иржээ. Төлөвлөсөн тээврийн хэрэгслүүд бүгд орж ирсний дараа ачаатай чиргүүлийг монгол тээвэрлэгч нар цагдаагийн хяналтад Улаанбаатар руу цуваагаар хүргэх юм.

Дээрх 23 тээврийн хэрэгслээр эм, эмнэлгийн тоног төхөөрөмж, хүнсний бүтээгдэхүүн зөөвөрлөж байгаа ажээ.

Олон улсын ачаа тээврийн автомашины чирэгч, чиргүүлийг хилийн Алтанбулаг боомт дээр солилцож, туршилтын татан авалт хийх ажилд ХХЕГ, МХЕГ, ГЕГ зохион байгуулалттай шуурхай ажиллаж байна.

Эх сурвалж: Зам тээврийн хөгжлийн яам

Алтанбулаг боомтоор эм, эмнэлгийн тоног төхөөрөмж, хүнсний бүтээгдэхүүн зөөвөрлөсөн 23 тээврийн хэрэгслийг нэвтрүүлж байна

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.