Эрүүл мэндийн яамнаас коронавирусийн халдварын нөхцөл байдлын талаар ээлжит мэдээллээ өглөө.

Өчигдөр орой "Тэнүүн-Огоо" ХХК-ийн автобус баазын жолоочийн эхний шинжилгээний хариу эерэг гарсан талаар бид мэдээлсэн. Тэгвэл өнөөдөр PCR шинжилгээний хариу нь гарчээ.

Тухайн жолоочийн давтан шинжилгээ эерэг  гарсан байна. Энэ талаар ХӨСҮТ-ийн Тандалт судалгааны хэлтсийн дарга А.Амбасэлмаа "Өнөөдрийн батлагдсан тохиолдлын нэг нь "Тэнүүн-Огоо" ХХК-ийн автобус баазын жолооч байсан нь үнэн. Жолооч нь хамгийн сүүлд энэ сарын 24-нд ажилдаа очсон байна лээ. Түүний гэр бүлийн хүн коронавирусээр өвчилсөн байна. Энэ нь Чингэлтэй-Зунжин чиглэлийн автобусны жолооч байсан. Түүний ойрын хавьтал 10 гаруй хүнийг тусгаарласан. Мөн бааз нь 90 гаруй ажилтантай юм билээ. Ойрын болон дам хавьтлын бүх хүнийг тусгаарлаад шинжилгээ авч байгаа. Энэ сарын 20-24-ны хооронд автобусаар үйлчлүүлсэн иргэд шинжилгээ өгөөрэй" гэв.