“Улаан чулуут” хогийн цэгт эмнэлгийн аюултай хог хаягдал болох цустай хуруу шил, зүү тариур, шинжилгээний дээж, амны хаалт зэргийг ил задгай хаяж, түүн дээр нь нохой, шувуу олноороо шавж байгаа сурвалжилгыг манай сэтгүүлч бэлтгэн хүргэсэн. Эмнэлгийн аюултай хог хаягдлыг устгах эрх бүхий хоёр компани бий. Тодруулбал, “Элемент медикал”  компани нь Улаанбаатар хотын хэмжээнд эрүүл мэндийн салбарын 1407 байгууллагын аюултай хог хаягдлыг тээвэрлэж, устгадаг. Улсын 56 эмнэлэг, 358 эмийн сан, өрхийн 136, хувийн 773 эмнэлэг, эрүүл мэндийн 84 байгууллагатай гэрээтэй ажилладаг. Мөн 900 орчим байгууллагатай гэрээтэй, хог хаягдлыг нь устгадаг байна. Энэхүү асуудалтай холбоотойгоор ЦЕГ, НМХГ-ын мэргэжилтнүүд мэдээлэл хийлээ. 

        Энэ  талаар Экологийн цагдаагийн албанаас "Улаан чулуутын хогийн цэгт эмнэлгийн аюултай хог хаягдал асгасан байна" гэх мэдээллийн дагуу МХЕГ-ын Сонгинохайрхан дүүрэг дэх мэргэжлийн хяналтын хэлтсийн улсын байцаагч, Байгаль орчны улсын байцаагчид ажиллаа. Шалгалтын үеэр ил задгай хаясан байсан хог, хаягдлыг компани дээр авчирч, ариутгал халдваргүйжүүлэлт хийгээд хадгалсан . Энэ хог хаягдалд олон хуруу шил байсан. Үүгээр нь шалгахад "Элемент медикал" компанид 2020 оны Улсын мал эмнэлгийн төв лаборотариас хүлээлгэн өгсөн 196.3 кг хог хаягдал байх магадлал өндөр байна. Үүнийг тухайн компанийн жолооч арванхоёрдугаар сарын 9-нд буталж, ариутгалгүй ил задгай аваачиж хаясан нь хяналтын камераар тогтоогдсон. Иймд Сонгинохайрхан дүүргийн нэгдүгээр хэлтэст тухайн жолоочид эрүүгийн хэрэг нээн шалгаж эхэлсэн. Мөн холбогдох ажилтнаас мэдүүлэг авах зэргээр шалгалтын ажлыг үргэлжлүүлж байна" гэв. 

-Яагаад ковидтой холбоогүй хог хаягдал гэж үзэж байгаа юм бэ. Халдвар хамгааллын хувцас, зүү тариур, амны хаалт, нэг удаагийн бээлий нь ковид гарсны дараах хог хаягдал байсан шүү дээ?

-Олдсон хаяг дээр байгаа шинжилгээний дээжүүд дээр мал эмнэлгийн лаборатори дээрээс хүлээлгэж өгсөн хог байна гэдэг нь тогтоогдсон. Мөн “Элемент медикал”  компанийн жолооч нь тухайн газраас хүлээж аваад тухайн компанидаа хүлээлгэн өгсөн хуудас байдаг юм байна. Энэ хуудаст ямар компани хэдий хэмжээний хог хаягдал хүлээлгэж өгсөн нь бичигдсэн байдаг. Мөн мал эмнэлгийн лаборатори улаан өнгийн уутанд хог хийж өгсөн гэж мэдээлсэн байна. Сүүлийн үед эмнэлгийн аюултай хог хаягдлыг шар өнгийн уутанд хийж байгаа. Энэ хаягдал нь улаан өнгийн уут байсан. Мөн нэг удаагийн зүү тариур байсан гэж байна. Шалгалтаар нэг удаагийн зүү тариур тухайн газарт байсан нь тогтоогдоогүй гэлээ. 

       Албаныхан дээрх мэдээллийг өгч байгаа ч манай сурвалжилгын үеэр авсан гэрэл зураг, видео дүрсэнд шар өнгийн ууттай аюултай хог хаягдал байгааг та бүхэн харж болно. Бид уг асуудалтай холбоотой мэдээллийг үргэлжлүүлэн судалж, дахин мэдээлэх болно. Энэ нь нэгэн компанийн хариуцлага ажил, цаашлаад залхуурсан жолоочийн хуумгай явдал төдий асуудал биш бөгөөд үндэсний аюулгүй байдал, нийтийн эрүүл, аюулгүй орчинд амьдрах эрхийг зөрчсөн ноцтой хэрэг мөн билээ.  

https://ergelt.mn/news/66/single/3675

https://ergelt.mn/news/60/single/3705

Үргэлжлэл бий...