СУРАГГҮЙ БОЛСОН ХОЁР НАСТАЙ ХҮҮГ ЭРЭН ХАЙХ АЖИЛЛАГАА ЗУРГАА ДАХЬ ӨДРӨӨ ҮРГЭЛЖИЛЖ БАЙНА

        Хөвсгөл аймгийн Тариалан сумын Баянхошуу багийн Сайхан мод хэмээх газраас энэ сарын 17-нд хоёр настай хүү сураггүй болсон мэдээлэл Хөвсгөл аймгийн Онцгой байдлын газарт бүртгэгдсэн байдаг. Хүүг эрэн хайх ажиллагаа өнөөдөр тав дахь өдрөө үргэлжилж байгаа билээ. Эрлийн ажиллагаанд Онцгой байдлын газар, цагдаа, ШШГГ, Хүүхдийн байгууллагын алба хаагчид, орон нутгийн удирдлагууд, иргэд, төрийн албан хаагчид эрэлч нохдын хамт оролцож байгаа билээ. Харин өнөөдөр эрлийн ажиллагаа хэрхэн үргэлжлэх, цаашид ямар арга хэмжээ авах талаар Хөвсгөл аймгийн Онцгой байдлын Ерөнхий газрын дэд дарга Б.Батзоригоос тодруулахад “Хоёр настай хүүг хайх ажиллагаа тав дахь өдрөө эхэлж байна. Өнөөдрийн байдлаар эрлийн багийнхан гурван хэсэгт хуваагдан үүрэгт ажлаа гүйцэтгэнэ. Өнөөдрийн байдлаар эрлийн багт 246 хүн, 10 нохой, 142 техник, есөн дронтойгоор үйл ажиллагааг явуулж байгаа. Мөн шөнийн ажиллагаанд Хойд бүсийн Онцгой байдлын дарга, хурандаа Ш.Баасандоржоор ахлуулсан штабынхан хээрээр хоноглож байгаа. Одоогийн байдлаар хүүгийн талаарх мэдээлэл, явсан газрынх нь ул мөр илрээгүй байна” гэсэн юм.

Г.БОЛОРТУЯА: ХҮҮГ АЛГА БОЛОХООСОО ӨМНӨ ХОНОГЛОСОН АЙЛААС САЙХАН МОД ХҮРТЭЛХ ГАЗАР САМНАЛТ ХИЙЖ БАЙГАА

       Харин Хөвсгөл аймгийн Онцгой байдлын Сургалт, судалгаа хариуцсан мэргэжилтэн Г.Болортуяа “Эрлийн багийнхан өчигдөр хүүгийн гэр болон алга болохоосоо өмнө хоносон айлын ойролцоо эрлийн ажиллааг үргэлжлүүлсэн. Хүүг алга болохоосоо өмнө хоноглосон айлаас Сайхан мод хүртэлх газар эрлийн багийнхан самналт хийж байгаа. Хүүхдийг эрэн хайх ажиллагааг эрчимжүүлэх зорилгоор Хөвсгөл аймгийн Засаг дарга УОК-т агаараас эрэн хайх аврах ажиллагааг зохион байгуулж, дэмжлэг үзүүлэх хүсэлт гаргасан. Мөн хүүхдийг эрэн хайх ажиллагаанд оролцсон таван иргэн сураггүй болсон гэх мэдээлэл гарсан. Тэд замаасаа жаахан хазайсан байсан учир удалгүй олдсон. Эрэн хайх ажиллагаанд сайн дураараа оролцож байгаа иргэдийг гэгээ тасрахаас өмнө буцааж байгаа” гэв.

АЛГА БОЛСОН ХҮҮГИЙН ЭЭЖ С.МЯГМАРСҮРЭН: ХҮҮГ МИНЬ ДЭЭЛТЭЙ ХҮН ТЭВРЭЭД ГАРААД ИРЭХ ЮМ ШИГ САНАГДААД БАЙГАА

        Хүүгийн ээж С.Мягмарсүрэн “Манай Хөвсгөл аймгийн Тариалан суманд дөрөв дэх жилээ өвөлжих гэж байна. Бид саахалтынхантайгаа мод бэлтгэхээр ярилцаад аав, ах хоёрынхоо араас бид хүүхдүүдтэй явсан юм. Биднийг мод бэлтгэх газар ирэхэд хоёр настай хүү, таван сартай охин минь унтаж байсан. Нөхөр маань мод бэлтгэхээр явсан байсан. Би хоёр хүүхэдтэйгээ үлдсэн юм. Хүүхдүүд минь унтаж байсан болохоор машиныхаа ойролцоо үйлс түүхээр шуудай асуухаар 200-аад метрын ойролцоо байсан машин дээр очиж шуудай асуусан юм. Шуудай байхгүй ажиллахгүй хөрөөг машиндаа тавиарай гэхээр нь тэр хөрөөг нь аваад ирэхэд хүү минь алга болчихсон байсан. Тэгэхэд би хамгийн удаандаа 20 минут л явсан. Тэгээд би хэсэг хайж, гүйсэн. Тэр үед холбогдох газрууд руу утсаар ярьж мэдэгдье гэсэн бодол ухаанд орж ирдэггүй юм билээ. Аавыг нь харанхуй болохоос өмнө хүмүүст мэдэгдэе гэхэд нь утсаа аваад сүлжээ барих газар руу явсан. Тэгээд аймгийн Онцгой байдлын газарт 16:55 цагийн үед мэдэгдсэн. Хүүг минь алга болсныг мэдсэн ойр дотны хүмүүс маш хурдан ирсэн. хамгийн анх хадам эгч рүүгээ ярьан. Тэр өдрөөс хойш ямар ч сураг чимээ гарахгүй ул мөр гарахгүй байгаад гайхаж байна. Хүү минь ард талын суудал дээр унтаж байсан. Харин дүүг нь жолоочийн хажуу талын суудлыг арагш нь тултал хэвтүүлээд унтуулчихсан байсан юм. Хүү минь сэрсэн даруйдаа дүүгээ харах ёстой. Өмнө нь дүүтэй нь хамт үлдээгээд явахад дүүгээ орхиод явж байгаагүй. Машинаасаа буусан байлаа ч гэсэн хол явах ёсгүй хүүхэд. Би хүүгээ эсэн мэнд байгаа гэж бодож байгаа. Хаа нэг газраас эрэгтэй хүн тэврээд гараад ирэх юм шиг мэдрэмж төрж байгаа. Хэрвээ хүүд минь муу зүйл тохиолдсон бол надад ямар нэгэн байдлаар мэдэгдэх ёстой. Эрлийн багийнхан ч олох ёстой гэж бодож байгаа. Хүүг минь олохын тулд алба хаагчдаас гадна олон хүн цуглаж тусалж байгаад баярлаж байна” гэсэн юм.

ЦЕГ:СУРАГГҮЙ БОЛСОН ХОЁР НАСТАЙ ХҮҮГИЙН МЭДЭЭЛЛИЙГ ТӨЛБӨРТЭЙ АВНА

       Харин ЦЕГ-ын Хэвлэл мэдээллийн төвийн мэргэжилтнээс цагдаагийн алба хаагчид эрлийн ажиллагаанд хэрхэн оролцож байгаа талаар тодруулахад Хөвсгөл аймгийн Тариалан сумын  тавдугаар баг, “Сайхан мод” гэх газраас есдүгээр сарын 17-ны өдөр хоёр настай хүүхэд алга болсон гэх мэдээллийг 20:40 минутад цагдаагийн байгууллага хүлээн авч, эрэн хайх, мөрдөн шалгах ажиллагааг явуулж эхэлсэн. Эрэн хайх ажиллагаанд Хөвсгөл аймгийн цагдаагийн газар, Эрүүгийн цагдаагийн албаны Эрэн сурвалжлах хэлтсийн алба хаагчид болон үнэрлэх, эрэн хайх чиглэлээр бэлтгэгдсэн нохойнууд, төлөөлөгчдийн хамт нэмэлтээр үүрэг гүйцэтгэн, холбогдох байгууллага, иргэдтэй хамтран үүрэг гүйцэтгэж байгаа болно. Одоогоор алга болсон бага насны хүүхэд олдоогүй, иргэдийн төрөл бүрээр таамаглаж байгаа шиг нөхцөл байдал тогтоогдоогүй, шалгалтын ажиллагаа үргэлжилж байна. Сураггүй алга болсон хоёр настай хүүхэдтэй холбоотой мэдээллийг Сангийн сайд, Хууль зүй, дотоод хэргийн сайдын хамтарсан тушаалын дагуу иргэдээс мэдээлэл төлбөртэй авна.