Энэ намрын номын баяр өнгөрсөн амралтын өдрүүдэд амжилттай болж өндөрлөсөн. Залуу уншигчдын хувьд номын баярыг хүлээх нэгэн шалтгаан нь дуртай номын зохиолчтойгоо уулзах. Үйл явдалд нь хөтлөгдөн, дүрүүдтэй нь хамт гуньж, баярлаж, догдлон тэмүүлсэн тэр л номыг бичсэн хүнтэй уулзах мөчийн догдлол гэгээн. Зохиолчид ч ялгаагүй хайрлан, харуусан бичсэн номыг нь уншиж, бүх зүйлийг нь хамтдаа мэдэрсэн уншигчидтайгаа уулзах нь том баяр байдаг болов уу. Бид энэ номын баяраар залуу уншигчдын сэтгэгдлийг сонслоо.

Хэдий номын баяр дууссан хойно хүргэж байгаа ч тэдний догдлол одоо ч шинэхнээрээ байгааг үүнийг уншсан та мэдрэх болов уу.

З.ЖАВХЛАН: Зохиолчтой уулзаж, гарын үсэг авах нь яг л дуртай дуучинтайгаа таарах мэт гоё мэдрэмж төрүүлдэг

 Тэр МУИС-д сурдаг бөгөөд энэ жил хоёрдугаар курсэд элсжээ. Ном унших тухайд “Би философийн ном унших дуртай учир тэр чиглэлийнхээ номыг судалж, таалагдвал худалдан авдаг. Сүүлийн үед "Цойлогсод" ном их сэтгэлд хүрч, нөлөөлсөн. Ном уншихдаа асар чимээгүй, гэрэл багатай орчинд ганцаараа байх дуртай. Зохиолчтой нүүр тулан уулзаж, гарын үсэг авах нь яг л дуртай дуучинтайгаа таарах мэт гоё мэдрэмж төрүүлдэг” гэв.

СЭЗИС-ИЙН II КУРСИЙН ОЮУТАН Б.БАТБОЛД: УРАН ЗОХИОЛЫН НОМ УНШИХ ДУРТАЙ

       Түүний хувьд “Би уран зохиолын ном унших дуртай. Анх гуравдугаар ангидаа үлгэрийн түүвэр уншиж эхэлсэн. Сүүлд ‘Contact’ ном их таалагдсан. Хажуудаа цай, амттан тавиад бүдэг гэрэлд ном унших дуртай. Хүмүүс ном уншихгүй байгаа биш өөрсдийнхөө хэмжээнд уншиж л байгаа. Хамгийн гол нь цахим ном их болсон нь хараа муудахаас эхлээд сөрөг талтай байна” гэж байв.

А.ГЭРЭЛТБААТАР: Ном уншихдаа ганцаараа байх дуртай

        Тэрбээр  “Энэ жил номын баяр илүү олон ном, шинэ зохиолчтой болсон санагдлаа. Би уран зохиол, түүхийн ном сонирхож ирсэн. Сүүлийн үед уншсан ‘Dune’ ном надад их сонирхолтой санагдсан. Намар эсвэл зуны орой, ер нь сэрүүн агаартай нөхцөлд ном унших таатай” гэнэ.

Х.СЭЛЭНГЭ: Дуртай номын зохиолчтойгоо уулзах шиг сайхан зүйл үгүй

        МУИС-ийн шинэхэн элсэгч Х.Сэлэнгэтэй номын баяр дээр таарсан юм. Түүнээс ямар ном сонирхож байгааг нь асуутал “Энэ жилийн номын баяр хамаагүй өргөн хүрээтэй болж байна. Би өнөөдөр түүхийн болон уран зохиолын ном сонирхохоор ирсэн. Хамгийн сүүлд хичээлтэйгээ холбоотойгоор “Шашин судлал” гэдэг ном уншсан. Дуртай номын зохиолчтойгоо уулзах шиг сайхан юм үгүй шүү дээ. Үүнийг унших хүмүүст “The Nicholas Sparks The Guardian” номыг уншихыг санал болгож байна. Ээж надад энэ номыг өгч байсан л даа. Ээжид харин үеэл эгч нь өгсөн гэсэн” гэлээ.

Э.ӨГӨДЭЙ