Хуваарь ёсоор долоо хоног бүрийн даваа гарагт УИХ дахь намын бүлгүүд хуралддаг билээ. Энэ дагуу өнөөдөр УИХ дахь Ардчилсан намын бүлэг ээлжит хуралдаанаа хийнэ. Тус бүлэг бүлгийн даргаа сонгоно.Өнгөрсөн долоо хоногт бүлгийн даргын асуудал яригдахад Улсын дээд шүүх намын даргыг бүртгэх шийдвэр гаргасны дараа бүлгийн даргаа сонгох нь зүйтэй гэж үзсэн аж. Улсын дээд шүүх өнгөрсөн пүрэв гаригт АН-ын даргаар О.Цогтгэрэлийг бүртгэж баталгаажуулсан. Ингэснээр УИХ дахь АН-ын бүлэг дараагийн даргаа тодруулах шаардлагатай болсон юм. Одоогийн байдлаар улс төрийн хүрээнд УИХ-ын гишүүн Х.Тэмүүжин, Б.Жаргалан тэргүүтэй гишүүдийн нэрс хамгийн идэвхтэй яригдаж буй юм.