Монголын бүх ард түмний зуны спортын зуны XVI наадмын хүндийн өргөлтийн спортын тэмцээн Баянхонгор аймагт явагдаж өндөрлөв. Бүх ард түмний XVI их наадмын хүндийн өргөлтийн эмэгтэйчүүдийн 53 кг-ын жинд өрсөлдөж хүрэл медаль хүртсэн, “Хилчин” спорт хороо, “Ээрмэл” клубийн тамирчин Цэгмидийн Юмчиннямтай ярилцлаа.

-Монголын бүх эрд түмний XVI их наадмаас медаль хүртсэнд баяр хүргэе.

        -Баярлалаа

-Огцом, түлхэлттэй өргөлт, нийлбэр дүнгээр хэдийг өргөж медальт байрт шалгарав?

       -Бүх ард түмний XVI их наадмын 53 кг-ын жинд өрсөлдсөн. Их наадамд огцом өргөлтөөр 55 кг-ыг, түлхэлттэй өргөлтөөр 67 кг, хоёр өргөлтийн нийлбэр өргөлтөөр 122 кг өргөсөн амжилтаар хүрэл медаль хүртсэн

–Манай уншигчдад өөрийгөө танилцуулахгүй юу?

       -Сайн байцгаана уу. Намайг Цэгмэд овогтой Юмчинням гэдэг. Одоо 19 настай.

–Аль аймаг, хотод төрсөн хүүхэд вэ?

       -Би Өвөрхангай аймгийн Арвайхээр хотод төрж, өссөн.

–Ажилладаг уу, сургуульд сурч байгаа юу?

      -Түрүү жил оюутан болсон. Энэ жил 2-р курсийн оюутан.

-Хүндийн өргөлтийн спортын ямар зэрэг , цолтой тамирчин бэ?

      -Хүндийн өргөлтийн спортын дэд мастер цолтой.

-Хэдэн настайдаа хүндийн өргөлтөөр хичээллэж эхэлсэн бэ?

     -Ерөнхий боловсролын дунд сургуулийн 5-р ангийн сурагч байх үедээ хүндийн өргөлтийн спортыг сонирхон хичээллэж эхэлсэн.

–Хүндийн өргөлтөөс өмнө өөр спортын төрлөөр хичээллэж байсан уу?

     -Бага байх даа л хүндийн өргөлтийн спортыг сонгосон болохоор өөр спортын төрлийг сонирхож хичээллээгүй. Тийм болохоор хүндийн өргөлтийн спортоор одоо хүртэл тууштайгаар хэвээр хичээллэж байгаа.  

–Анх яагаад чухам хүндийн өргөлтийн спортыг сонгож хичээллэх болсон юм бэ?

      -Анх Өвөрхангай аймгийн хүндийн өргөлтийн секцэнд орох гэж В.Дэмбэрэлдорж дасгалжуулагч дээрээ очсон. Багш намайг шалгаж үзээд “Миний охин ирээдүйд аварга болно оо” гэсэн. Тэр үгэнд нь урамшаад секцээ таслахгүй байхыг хичээн, хичээллэж эхэлсэн.

–Хүндийн өргөлтийн спортоор хичээллэсэн үеэс хойших томоохон амжилтаасаа сонирхуулахгүй юу?

      -Өсвөр үеийн улсын аварга шалгаруулах тэмцээнд гурван удаа түрүүлсэн. Залуучууд, насанд хүргэгчдийн УАШТ-ий мөнгө, хүрэл медальтай. Мөн хүүхдийн их наадмаас алтан медаль хүртэж байсан. Сая Монголын бүх ард түмний наадмаас хүрэл медаль хүртлээ.

-Одоо ямар клуб, нийгэмлэгт харъяалагдаж байгаа юу?

      -Одоо “Хилчин” спорт хорооны Чинзориг дасгалжуулагчтай “Ээрмэл” клуб харьяалагдан бэлтгэлээ хийж байгаа.