Нийгмийн хамаг сенсацитай сэдвүүдийг улстөржүүлж, “гудамжны” тэмцэгчийн дүрээр олонд танигдсан УИХ-ын гишүүн С.Ганбаатарын суудал ганхаж эхэллээ. Түүнийг хууль хяналтын байгууллагаас шалгаад хагас жилийн хугацаа өнгөрч, цаашлаад яллагдагчаар татах санал хүргүүлж байгаагаа албан ёсоор мэдэгдээд байна. Монголын улс төрд нам дамжиж, тойрог алгасаж, халдашгүй дархан эрхээр хамгаалуулж байгаа түүнийг хуулийн байгууллагаас шалгаж эхэлмэгц, утсаа асааж лайв хийдэг, УИХ дахть намын бүлгээр хамгаалуулах гэж “хашгирч” эхэлсэн нь ч тун хачирхалтай байна.          

              УИХ-ын гишүүн С.Ганбаатарын өрөөнд өнгөрсөн баасан гарагт АТГ-ын хоёр мөрдөгч, гүйцэтгэх ажиллагаа явуулж, шалгалт хийсэн талаар Ардчилсан намын бүлгээс чуулганы хуралдаан дээр мэдэгдэл хийсэн. Энэ талаар УИХ-ын гишүүн Б.Жаргалан “АТГ-ын Балдандорж, Батмөнх нарын хоёр мөрдөгч Төрийн ордонд ажилладаг нэр бүхий албан тушаалтны нэр дээр нэг удаа нэвтрэх зөвшөөрөл авч орж ирээд, УИХ-ын гишүүн С.Ганбаатарын өрөөнд бичлэг хийн орж, гүйцэтгэх ажиллагаа явууллаа. Энэ бол УИХ-ын гишүүний бүрэн эрхэд халдсан, Парламентын дархлааг үлэмж сулруулсан, засаглал хоорондын хяналт тэнцлийг үгүй хийсэн УИХ-ын байр, Төрийн ордонд гүйцэтгэх ажиллагаа явуулсан ноцтой асуудал гэж АН-ын бүлэг үзэж байна. УИХ дахь АН-ын бүлэг энэ асуудалд зайлшгүй анхаарал хандуулах ёстой гэж үзэж, Үндсэн хуулиар баталгаажсан засаглалын хяналт, тэнцлийг хангах, Парламентын дархлааг бэхжүүлэх нь энэ УИХ-ын бүрэлдэхүүний хувьд нэн чухал гэж үзэж байна” хэмээн мэдэгдэж, 2026 оны төсвийн хэлэлцүүлгээс завсарлага авсан билээ.

       Хууль тогтоох дээд байгууллага, Төрийн ордонд УИХ-ын гишүүний өрөөнд АТГ-ынхан хууль бусаар нэвтэрч ороод гишүүний бүрэн эрхэнд халдсан мэт сүржин мэдэгдлийн ард дахь бодит үнэн өөр байв. Өөрөөр хэлбэл, УИХ-ын гишүүн С.Ганбаатарыг хууль хяналтын байгууллагаас шалгаж, яллагдагчаар татах тогтоолыг Халдашгүй байдлын дэд хороонд хүлээлгэж өгсөн гэдгийг албаныхан мэдээллээд байна.

НИЙСЛЭЛИЙН ПРОКУРОРЫН ГАЗРААС ИРҮҮЛСЭН ЯЛЛАХ ДҮГНЭЛТИЙГ УИХ-ЫН ГИШҮҮН С.ГАНБААТАР ХҮЛЭЭЖ АВАХААС ТАТГАЛЗЖЭЭ

      Тодруулбал, АТГ-аас “Төрийн ордонд АТГ-аас ажиллагаа явуулаагүй. Яллагдагч С.Ганбаатар тогтоолыг авахаас зайлсхийсэн учраас, яллагдагчаар татах тогтоолыг Халдашгүй байдлын дэд хороонд өгсөн. УИХ-ын гишүүн С.Ганбаатарт нэр холбогдсон хэрэгт хэрэг бүртгэл нээгээд зургаан сарын хугацаанд шалгасан. Энэ оны наймдугаар сарын 6-нд хэрэг бүртгэлтийн хэрэг нээж, мөрдөн шалгах ажиллагаа явуулж, хэргийг шүүхэд шилжүүлэх саналтай мэрэгжлийн прокурорын газарт шилжүүлсэн. Сар гаруй хугацаа өнгөрсөн байна. Нийслэлийн прокуророос яллах дүгнэлт үйлдэж, хэргийн оролцогчид албан ёсоор гардуулах ёстой. Энэ хүрээнд нийслэлийн прокурорын газраас прокурорын мэдэгдэх хуудсыг гардуулах хүсэлт ирсэн. Ингээд АТГ-аас яллах дүгнэлтийг хүргэж өгсөн. Уг нь хэргийн оролцогч өөрөө яллах дүгнэлтээ очиж гардах ёстой. Дуудан ирүүлэх асуудлыг прокурорын байгууллагаас гурван удаа хүлээлгэж өгөхөөр дуудсан боловч ирээгүй. Насанд хүрсэн гэр бүлийн хүнд нь гардуулах байсан ч мөн хүлээж аваагүй. Өөрийнх нь цахим хаягаар хүргүүлсэн ч мөн хариу өгөөгүй. Түүнээс биш ямар нэг гүйцэтгэх ажиллагаа явуулаагүй. Хэргийн оролцогч хуульд заасан үүргээ биелүүлсэн бол ийм асуудал үүсэхгүй байлаа. Нэгэнт өөрөө санаатайгаар татгалзсан учраас мөрдөгч өөрийн арга барилаар Төрийн ордонд нэвтэрсэн. Улмаар дуудах хуудсыг хүлээж аваагүй учраас албан ёсоор баталгаажуулсан” хэмээн мэдэгдсэн.  

       Ийн хууль тогтоох дээд байгууллагад ажиллаж, хууль батлан гаргаж буй УИХ-ын гишүүн С.Ганбаатар олныг төөрөгдүүлэх сүржин мэдэгдэл гаргасан уу гэдэг нь анхаарал татаж байна. Үндсэндээ УИХ-ын гишүүн С.Ганбаатарыг хуулийн байгууллагаас зургаан сарын хугацаанд шалгаж, яллагдагчаар татах саналаа хүргүүлсэн байна.

УИХ-ЫН ГИШҮҮН С.ГАНБААТАРЫН ББҮРЭН ЭРХИЙГ ТҮДГЭЛЗҮҮЛЭХ САНАЛЫГ УЛСЫН ЕРӨНХИЙ ПРОКУРОР ИХ ХУРАЛД ОРУУЛАХ УУ

         УИХ-ын гишүүн С.Ганбаатарыг АТГ-аас Монголын Үйлдвэрчний эвлэлийн холбооны зарим албан тушаалтан тус холбоонд бүртгэлтэй газрыг бусдад хууль бусаар шилжүүлсэн, хариуд нь хахууль авсан, мөнгө угаасан байж болзошгүй гэх хэрэгт мөрдөн шалгах ажиллагаа явуулж эхэлсэн байдаг. Мөн тэрбээр эхнэрийнхээ нэр дээрх 29 компаниа нуусан байж болзошгүй үндэслэлээр АТГ-аас шалгаж эхэлсэн байдаг.  С.Ганбаатарын хувьд хөрөнгө орлогын мэдүүлэгтээ хоёрхон компанитай гэж мэдүүлсэн байдаг. Гэвч эхнэр Б.Тунгалагийнхаа нэр дээр үйл ажиллагаа явуулдаг 29 орчим компани, ТББ бүртгүүлжээ. Тухайлбал, аялал жуулчлалын чиглэлээр 2005 онд байгуулсан “Андискауред Монголиа” ХХК-ийг эхнэр Б.Тунгалагтайгаа хамтран эзэмшдэг ч, хөрөнгө орлогодоо мэдүүлээгүй байх жишээтэй. Цаашлаад  гадаад худалдаа, бизнесийн зөвөлгөө өгөх чиглэлээр байгуулсан  “Дархан ургах наран зүг” ХХК, аялал жуулчлалын чиглэлээр үйл ажиллагаа явуулдаг “Альпс ПНҮ”, “Ворлд плас файв”, “Монгол малын бэлчээрийн менежмент” ХХК,  “Боорчи баатар” ХХК, “Адвант трейд” ХХК зэрэг компаниа  эхнэр Б.Тунгалагийнхаа нэрээр  удирддаг байна. Гэвч эхнэрийнхээ нэр дээрх бүртгэлтэй 20 гаруй компани, ТББ-ын алийг нь ч тэр хөрөнгө орлоготоо дурдаагүй бөгөөд хөрөнгөө нуун дарагдуулсан ноцтой баримтын сэжүүр эндээс олджээ. Одоогийн байдлаар хууль хяналтын байгууллагаас С.Ганбаатар, Б.Тунгалаг нар дээр нэр дурдагдсан 29 компани, аж ахуйн нэгжид хэрхэн оролцоотой ажиллаж, амьдрач байсныг нь дэлгэрүүлэн шалгаж байгаа ажээ.

         Цаашлаад УИХ-ын гишүүн С.Ганбаатарын бүрэн эрхийг түдгэлзүүлэх саналыг Улсын ерөнхий прокурор Д.Жаргалсайхан Их хуралд оруулахаар бэлдэж эхэлсэн гэх мэдээлэл ч бий. Ийн түүнийг албан тушаалын байдлаа урвуулан ашиглаж, хууль бусаар газар зарсан эсэх, улмаар хөрөнгө орлогоо нуусан эсэхийг нь бүрэн эрхийг нь түдгэлзүүлэн шалгаж болзошгүй байна.