Отгонтэнгэр Их Сургууль нь Европын холбооны Erasmus+ MONGWBL төслийн хүрээнд Ажлын Байранд Суурилсан Сургалтын (АБСС) хөтөлбөрийг Дээд боловсролын сургалтанд нэвтрүүлж байна. Энэхүү ажлын хүрээнд ОТИС-ийн багш, оюутнуудад “АБСС”-ийн туршлага солилцох уулзалт, сургалтыг 2023.05.09-ний зохион байгууллаа.

            Хөтөлбөрийн гол зорилго нь хөдөлмөрийн зах зээлд хүний нөөц хомсдох  болсон энэ цаг үед оюутан төгсөгчдийг суралцах хугацаанд нь ажлын байранд сургаж хөгжүүлэх, мэргэжилдээ дуртай сонирхолтой болгох, дадлагажингаа цалин авах нийгмийн даатгал төлөх цаашилбал ажил олгогч дөнгөж төгссөн оюутнуудыг практикт сургаж авах зардал, цаг хугацаагаа хэмнэх, суралцах хугацаанд нь бэлдэж авах боломжийг бүрдүүлэхэд чиглэгдэнэ.

              ОТИС-ийн Эдийн Засаг Бизнесийн Удирдлагын Сургуулийн Банк, Санхүү, Бизнесийн удирдлага, Аялал жуулчлал, Нягтлан бодох бүртгэл мэргэжлийн оюутнууд Голомт банк, Төрийн банк, Тур операторууд, зочид буудал зоогийн газруудад АБСС-д хамрагдаж цалинтай дадлага зургаан сарын хугацаанд хийсэн. Энэ хугацаанд тухайн байгууллагын үндсэн ажилтны статусаар ажилласан бөгөөд оюутнуудын хувьд мэргэжлийн болон зөөлөн ур чадвараа хөгжүүлэх, ажлын байрны онцлогийг өөрийн биеэр мэдрэх гээд олон талын давуу талтай аж.