Хөвсгөл аймгийн Ханх сумын Бүрэнхаан ууланд авиралт хийсэн уулчдын нэг нь энэ сарын 6-нд төөрч, сураггүй болсон гэх мэдээлэл бий. Төөрсөн иргэнийг хилийн цэргийн 0257 дугаар ангийн алба хаагчид дроноор тодорхойлж, албаны нохойгоо дагуулж яваад олсон байна. Ингэснээр эрлийг амжилттай зохион байгуулсан 0257 дугаар ангийн хошууч В.Хуягтай холбогдож, эмэгтэйг хэрхэн аварсан талаар тодрууллаа.

-Орос эмэгтэйг төөрсөн гэх дуудлагын дагуу эрлийн ажиллагааг хэрхэн зохион байгуулсан бэ. Та бүхэнд дуудлагыг хэн өгсөн бэ?

      -Энэ сарын 6-нд ОХУ-ын 15 иргэн Бүрэнхаан ууланд авиралт хийхээр гарсан юм. Уулчдыг уул руу өгсөхөд нь гар станц өгч явуулсан нь сайн хэрэг болсон. Тэгээд уулчид уулнаас буухдаа "Нэгнийгээ олохгүй байна" гэх дуудлагыг бидэнд өгсөн. Дуудлага хүлээж авснаас цаг гаруй хугацааны дараа бид төөрсөн иргэнийг олсон. Ингэхдээ түүний байгаа газрыг дроноор тодорхойлж, бүлгийн гишүүн болон нохойгоо дагуулан явган явж, чимээ өгч олсон.

-Төөрсөн эмэгтэйн биеийн байдал ямар байсан бэ. Түүнд анхан шатны тусламж үзүүлсэн үү?

     -Өндрөөс болж түүний даралт ихсэж, зүрх нь муудсан учир багийнхантайгаа авиралтаа үргэлжлүүлж чадахгүй отог руугаа буцахаар үлдсэн юм билээ. Бусдаасаа хоцорсон даруйдаа төөрч улсын хилд тулах дөхсөн байсан. Улсын хилийн зурвасаас 4-5 километрт зайтай газраас төөрсөн иргэнийг олсон. Биднийг очиход иргэн айж, сандарсан байдалтай, даралт нь ихэссэн байсан төөрсөн гэдгээ ойлгосон байсан. 24-26 насны эмэгтэй байсан. Ууланд авирч байсан туршлагагүй учир зүг, чигийн баримжаагүй зогсож байсан. Биднийг аврахаар ирснийг мэдээд их баярлаж байна лээ. Аврагчдыг ууланд гарахад цастай байсан ч буухад нь цас хайлж байсан учир тэдний мөр арилсан байсан. Уг түүнтэй ойрхон морины жим байсан ч түүнийг олж хараагүй байсан. Түүнд анхан шатны тусламж үзүүлэх шаардлагагүй байсан.

-Төөрсөн иргэний байршлыг дроноор тодорхойлж, явганаар очиж авсан уу?

     -Жуулчдын явж байсан газар бартаа саад ихтэй, тайга, хад ихтэй учир машин явах боломжгүй. Зөвхөн албаны нохой болон дроноор хайх боломжтой. Тиймээс төөрсөн иргэнийг дроноор тодорхойлж, бүлгийн гишүүн, аврагч нохойтойгоо явганаар очиж, чимээ өгч авчирсан. Бид түүнд оросоор “Айх хэрэггүй. Бусад дээр чинь хүргэж өгнө” гэтэл баярлаад биднийг тэвэрсэн.

-Бусад нь ууландаа амжилттай авирч, бууж чадсан уу?

     -Бусад нь саадгүй авирч, отог дээрээ ирсэн. Тэднийг уулнаас бууж ирэхэд нь төөрсөн иргэнийг хүлээлгэн өгсөн. Тэд өглөө журмын дагуу нутаг руугаа буцсан.

-Хил дээр ажиллахад зөрчил хэр гардаг вэ?

      -Албан байгууллага учир хамаагүй мэдээлэл өгч болохгүй. Улсын хилийн дагуу иргэд төрөх, хилд тулах, шуурганаар төөрөх асуудал жил бүр гардаг. Харин манай хил бусдыгаа бодоход харьцангуй зөрчил багатай.

-Жил бүр Бүрэнхаан ууланд авиралт хийхээр ОХУ-аас уулчид ирдэг үү?

      -Жил бүр ОХУ-ын Буриад улсын 5000-7000 орчим уулчид оролцдог баяр болдог. Тиймээс жил бүр Бүрэнхаан ууланд авиралт хийхээр жуулчид ирдэг.

-Та хилийн цэрэгт хэдэн жил ажиллаж байна вэ. Цэргийн албаа хаана хаасан бэ?

     -Би хилийн цэрэгт 18 дахь жилээ алба хааж байна. Би хилийн цэргийн 0257 дугаар ангидаа 10 жил ажиллаж байна. Өмнө нь Багануурын 0252 дугаар ангид ажиллаж байсан. Харин цэргийн албаа Дорнод аймгийн Халхгол сумын 0198 дугаар ангид хааж байсан.

-Багаасаа цэргийн хүн болно гэж мөрөөдөж байв уу?

      -Багаасаа цэргийн хүн болно гэж мөрөөдөж, тэдний тухай сонсох, унших дуртай хүүхэд байсан. Мөн аавын минь мөрөөдөл байсан учраас би цэргийн хүн болохоор шийдэж байлаа. Миний удамд цэргийн хүн байхгүй. Хүү минь цэргийн хүн болно гэж ярьдаг, сонирхдог. Том болоод өөрөө шийдэх байх.

-18 жил хилийн цэргийн ангид ажил хэчнээн хилийн зөрчил илрүүлж байсан бэ?

     -Залуухан цэрэг байхдаа бусдад бусдад хиймэл амьсгал хийх зэргээр анхан шатны тусламж үзүүлж бусдыг аварч байсан. Бусдад анхан шатны тусламж үзүүлж байгаа хүн айж сандарч болдоггүй юм. Хэрвээ сандрах юм бол бусдыг аварч чадахгүй өөрөө давхар эрсдэлд орох магадлалтай. Сандрахгүй байх нь бидний хувьд хууль гэсэн үг.