Ховд аймгийн Дуут сумын дөрвөн хүн өвс, тэжээл хүргэхээр сураггүй болсон гэх мэдээлэл бий. Энэ талаар бид тус сумын мэргэжилтэнтэй холбогдож, цаг агаарын нөхцөл байдал болон тэдний талаар тодруулсан юм. Тэрбээр “Хөдөө өвс, тэжээл хүргэхээр яваад сураггүй болсон дөрвөн хүнийг өнөөдөр олсон. Тэднийг өвс, тэжээлээ хүргэж өгчихөөд сум руу явж байтал автомашин нь эвдэрсэн юм билээ. Сумынхантай “Биднийг амдаж аваарай, явган сум руу явж байна” гэж нэг удаа холбогдсон юм билээ. Манай суманд 1-1.20 см цас орсон болохоор эрлийн багийнхны машин цасанд суугаад явж чадахгүй байсан учир тэднийг богино хугацаанд олж чадаагүй. Харин сураггүй болсон дөрвөн иргэн айлын хашаанд хоносон байна лээ. Нэг эмэгтэйн даралт ихэссэнээс өөр бэртэл, гэмтэлгүй гэх мэдээлэл ирсэн” гэлээ.