Хөдөлмөр, нийгмийн хамгааллын дэд сайд, Хөдөлмөрийн аюулгүй байдал, эрүүл ахуйн үндэсний хорооны дарга С.Зулпхар болон тус хорооны гишүүдийн төлөөлөл “Хурд” группийн орон сууцны барилгын ажлын үйл явцтай танилцаж хөдөлмөрийн аюулгүй байдал, эрүүл ахуйг хангаж байгаа эсэхэд хяналт тавьж зөвлөмж өглөө.
 
1128 айлын орон сууцыг ашиглалтад хүлээлгэн өгөхөөр ажиллаж байгаа тус групп нь барилгын ажил эхлэхээс барилга хүлээлгэн өгөх үйл явц хүртэл гурван үе шаттайгаар хөдөлмөрийн аюулгүй байдал, эрүүл ахуйн асуудлыг хангаж ажилладаг тухай танилцуулав.
 
Энэ үеэр барилгын фасад буюу гадна талын өнгөн гадаргууг цэвэрлэх ажлыг "Анжис Тэнгэр" ХХК гүйцэтгэж байсан юм. Тус компани нь өндөрт олсны ажлаа эхлүүлэхийн өмнө дөрвөн үе шатыг дамжин ажлаа эхлүүлдэг байна.

Тодруулбал,

• ХАБЭА-н ажилтан ажлын талбай дээр очиж нийт ажилчидтайгаа хамтран эрсдэлийн үнэлгээ хийж эрсдэлийг бууруулдаг
• Супервайзер / ахлах ажилчид/ давтан аюулын дүн шинжилгээ хийж ХАБЭА-н ажилтан болон нийт олсны техникчидэд танилцуулж аюулыг шалгаж эрсдэлийг бууруулдаг
• Нийт олсны техникчид өндөрт ажиллах үеийн эрсдэлийг хяналтын шалгах хуудсыг бөглөж өөрсдийн багаж хэрэгслийн аюулгүй байдлаа бататгадаг
• ХАБЭА-н ажилтан өдөр тутмын зааварчилгаа өгч MNS4969:2000 дэвтэрт гарын үсэг зурснаар ажил эхлэхийг зөвшөөрдөг байна.