-Энэ жил цасан болон шороон шуургатай хүйтэн хавар боллоо. Харин энэ сард цаг агаар ямар байх төлөвтэй байна вэ?

     -Өнгөрсөн өвөл температурын хэлбэлзэл ихтэй байлаа. Нэгдүгээр сард Ховд, Өмнөговийн зарим сумдаар нэмэх хэм хүрч дулаарсан. Харин хүйтэрсэн үед Завханы Отгонд шөнөдөө -50 хэм давж хүйтэрсэн. Хаврын хувьд дээр хэлсэнчлэн салхи шуурга ихтэй, хүйтэн жиндүү хавар болж байна. Энэ сард Алтай, Хангай, Хөвсгөлийн уулархаг нутгаар олон жилийн дунджаас хүйтэн, бусад нутгаар дунджийн орчим байна. Хур тунадасны хувьд их нууруудын хотгор орчмоор олон жилийн дунджаас ахиу, Дорноговь, Сүхбаатарын өмнөд хэсгээр олон жилийн дунджаас бага, бусад нутгаар дунджийн орчим байх төлөвтэй байна. Зуны саруудад баруун болон говь төвийн аймгуудын нутгийн баруун хэсгээр олон жилийн дунджаас дулаан, хур тунадас харьцангуй багатай байна. Харин төв болон зүүн аймгуудын нутгаар агаарын температур болон хур тунадас дунджийн орчим байх төлөв гарсан.

-Энэ жил баруун бүсийн нутгаар зуншлага ямар болох төлөвтэй байна вэ?

    -Баруун аймгуудын ихэнх нутгаар энэ сард олон жилийн дунджаас хүйтэн, Их нууруудын хотгор орчмоор хур тунадас дунджаас ахиу орох төлөвтэй байна. Харин бусад нутгаар дунджийн орчим байх бол зургадугаар сард Баян-Өлгий, Увс, Ховдын нутаг, Завханы баруун, Говь-Алтайн ихэнх нутаг болон Баянхонгорын өмнөд хэсгээр олон жилийн дунджаас дулаан, хур тунадас дээрх бүс нутгаас харьцангуй бага байх төлөвтэй. Харин долдугаар сард баруун аймгуудын сумдаар  олон жилийн дунджаас дулаан, хур тунадас харьцангуй бага буюу ялангуяа нутгийн баруун өмнөд хэсгээр олон жилийн дунджаас бага байх төлөвтэй байна.

ХӨВСГӨЛ, АРХАНГАЙН БАРУУН ХЭСГЭЭР ОЛОН ЖИЛИЙН ДУНДЖААС ДУЛААН БАЙНА 

-Төвийн бүсийн нутгаар хур тунадас элбэгтэй байх урьдчилсан төлөв гарсан гэсэн. Үнэн үү?

    -Тавдугаар сар  болон зургадугаар сард төвийн аймгуудын нутгаар цаг агаарын температур болон хур тунадас нийт нутгаар олон жилийн дунджийн орчим байх төлөв гарсан байна. Харин долдугаар сард ихэнх нутгаар агаарын температур болон хур тунадас мөн дунджийн орчим байх төлөвтэй. Хөвсгөлийн нутаг, Архангайн баруун хэсгээр дунджаас дулаан байна. Хур тунадасны хувьд нийт нутгаар дунджийн орчим байна.

ГОВИЙН НУТГААР ОЛОН ЖИЛИЙН ДУНДЖААС БАГА ХУР ТУНАДАС ОРЖ, ХАЛАХ ТӨЛӨВТЭЙ БАЙНА 

-Зүүн бүсийн нутгаар хур тунадас хэр орох вэ?

    -Зүүн бүсийн нутгаар тав, зургаа, долдугаар сард агаарын температур нийт нутгаар олон жилийн дунджийн орчим байна. Харин тав болон долдугаар сард нутгийн өмнөд хэсгээр буюу Сүхбаатарын нутгаар олон жилийн дунджаас бага хур тунадастай бусад хугацаанд дунджийн орчим байх төлөвтэй байна.

-Сүүлийн жилүүдэд говийн нутгаар зуншлага тааруу байсан. Харин энэ жил ямар байх төлөвтэй байна вэ?

    -Агаарын температурын хувьд тавдугаар сард олон жилийн дунджийн орчим, зургаа болон долдугаар сард дунджаас дулаан байна. Энэ сард Дорноговийн нутгаар, зургаа, долдугаар сард ихэнх нутгаар дунджаас харьцангуй бага тунадас орох таагүй төлөв гарсан. Өнгөрсөн жил төв болон зүүн зүгийн нутгаар бороо хур элбэгтэй байсан бол энэ зун төв болон зүүн зүгийн нутгаар дунджийн орчим, баруун болон говийн бүс нутгаар бороо хур багатай, хуурай байх төлөв ажиглагдаж байна.