“Өнөр бүл хүүхдийн төв”-ийн Ерөнхий захирал М.Өлзийчимэг хүүхдийн эрх зөрчигдөж байгаа асуудлаар дараах мэдээллийг өглөө. Тэрбээр "Манай төвд 170 орчим хүүхэд амьдарч, хамгаалалтад байна. Манайд ирж байгаа хүүхдүүдийн олонх нь үл хайрхах хүчирхийлэлд өртсөн байдаг. Ирж байгаа хүүхдийн асуудлууд хүндэрсэн байна.

      Хамтарсан багийнхан өөрт нь тулгарсан асуудлыг шийдвэрлэхийн тулд ажиллаад байна. Хүүхдүүдийг асрамжийн газар өгөөд болчихдог мэт ойлгодог. Хэдий хүүхдүүд хүчирхийллээс ангижирч байгаа ч гэр бүлээрээ элэг бүтэн амьдрах эрх нь зөрчигдөж байна. Манайд 10 гаруй жил амьдарч байгаа хүүхэд ч байна. Эцэг, эх нь амьд байгаа хэр нь авдаггүй хүүхдүүд гэсэн үг. Архи уугаад, өөр амьдрал зохиогоод явж байна. Эцэг, эхээ санасан хүүхдүүд бэтгэрсээр байгаад сэтгэцийн өвчтэй болох явдал ч байна.

      Насанд хүрээд асрамжийн төвөөс гарахдаа хүүхдүүд маш их хямардаг. Дотуур байранд оруулж, сургуульд оруулсан ч эхний жилдээ бид мөнгийг нь төлөөд дараагийн жилээсээ хүндрэлтэй нөхцөл байдал үүсдэг. Ингээд ихэнх нь сургуулиа хаяж, цагийн ажил хийгээд явчих тохиолдол байна. Манайд байгаа шийдмээр асуудлын нэг нь нэг хоёр настай хэлгүй хүүхдээ гудамжинд хаяад, хүүхдээ хаясан хэргээр хоёр жилийн ял эдэлсэн. Ял эдэлж байх хугацаандаа дахин нэг хүүхэд гаргаж, хоёр хүүхдээ хоёуланг нь хаясан. Одоог хүртэл архи уугаад явж байна. Хорилоо гээд асуудал шийдэгддэггүй юм байна.

      Мөн олон жилийн өмнө нэг эмэгтэй орон гэргүй гээд хоёр хүүхдээ орхиод явсан. Хэдэн жилийн дараа гэр оронтой болоод хүүхдээ аваач гэтэл дахиад хоёр хүүхэдтэй болчихсон. Хэрвээ хоёр хүүхэдтэйг минь гэр бүлийн хүн маань мэдвэл энэ хоёр хүүхэд өнчрөх гээд байна гэсэн. Гэтэл нөгөө өнчрөх гээд байна гэсэн хоёр хүүхдээ хаяад дахиад хүнтэй суучихсан тохиолдол ч байна" гэлээ.