ОСНААУГ-ын хоёр ажилтан ажлын байран дээрээ нас барсан асуудлаар ар гэрийнхэн нь мэдээлэл хийлээ. Талийгаач “Э” –ийн эхнэрийн эгч “Бид нар хүнд хэцүү цаг хугацааг туулж байна. Өглөө ажилдаа яваад л гэртээ дахин хэзээч ирэхгүй явсан дүүгийнхээ араас гашуудаж ханахгүй байна. Миний дүү талийгаачийн эхнэр, түүний хүүхэд аавынхаа орон зайг үгүйлж, өдөр бүрийг шаналалтай өнгөрөөж байна. Мөн талийгаачийг өсгөсөн 84 настай өвөөгийнх нь бие муу байгаа. Сэтгэл санааны гутралд орсон. Талийгаачийн аав, ээж гэр бүлийнхэн уй гашуйд автсан. Хүргэн дүү маань маш зөв залуу, ямарваа нэгэн байдлаар архи, тамхи хэрэглэдэггүй, гэр бүлийнхээ сайн өрх толгойлогч байсан. Харин зарим нэгэн хэвлэл мэдээллийн хэрэгсэлүүд ташаа мэдээлэл түгээж, иргэдэд буруу ойлголт төрүүлж байгааг залруулах гэсэн юм” гэлээ. 

          Мөн “Гэр бүлийн зүгээс ОСНААУГ-т маш их гомдолтой байгаагаа илэрхийлж байна. Талийгаач маань тухайн үед ажлын байрнаасаа ажил үүргээ гүйцэтгэхээр гарсан. Бидний зүгээс хууль хяналтын байгууллагуудаар явж , хэрэгт холбогдох байгууллагуудад хуулийн дагуу хариуцлага тооцохыг шаардаж байгаа юм. Ажлын байрын аюулгүй байдал, багаж хэрэгслийн дутмаг байдлаас болж олон залуус миний дүүгийн адил биемахбодийн хохирол авч, амиа алдаж байна. Хөдөлмөр нийгэм хамгааллын яамны албан тушаалтнуудад хариуцлага нэхэж хүсэлт илгээж байна. Талийгаачдын амиа алдсан шалтгааныг буруу ташаа мэдээлсэн хэвлэл мэдээллийн байгууллагад гомдолтой байна. Хэрэг хяналтын шатандаа явагдаж, үнэн мөнөнийг тогтооно. Мэргэжлийн хяналтын газрын шинжээч хэргийн газар дүгнэлт хийсэн, хариу нь гараагүй байгаа. Талийгаач “Э” долдугаар сард мөн ОСНААУГ-т ажиллаж байхдаа осолд өртсөн. Холбогдох байгууллагаас талийгаачид 10 хоногийн акт олгосон боловч цалинг нь бодоогүй байсан. Мөн нуун дарагдуулсан. Энэ мэт ажлын байрны хариуцлага алдаж байгаад бид харамсалтай байна” гэв.