Нийслэлийн Хан-Уул дүүргийн 20 дугаар хороо “Мишээл-Экспо”-д өнөөдөр 06:30 цагт гал гарчээ. Дуудлагын дагуу тус дүүргийн Онцгой байдлын хэлтсийн Гал түймэр, унтраах аврах 14 дүгээр ангийн алба хаагчдыг очиход тус газрын “Street food” хоолны газрын дээвэрт гал гарч байжээ. Алба хаагчид 06:53 цагт галын тархалтыг зогсоож, 07:20 цагт бүрэн унтраалаа. Гал түймэр гарсан шалтгаан, нөхцөлийг тогтоохоор Гал түймрийн улсын хяналтын байцаагч, галын шинжээчийн бүрэлдэхүүн ажиллаж байна гэж Онцгой байдлын ерөнхий газраас мэдээллээ.