Засгийн газрын ээлжит хуралдаанаас гаргасан шийдвэрийг сайд нар танилцуулж байна. Энэ үеэр Барилга хот, байгуулалтын сайд Б.Мөнхбаатар мэдээлэл өглөө.

    Тэрбээр “Монгол Улс газар нутгийн хэмжээгээрээ дэлхийд дээгүүр байр эзэлдэг. Мөн нэг хүнд оногдох газар нутгийн хэмжээгээрээ нэгт ордог. Улаанбаатар хотын төвлөрлийг сааруулах Хөшигтийн хөндий, уул уурхайг дагаж бий болж буй Дархан, Эрдэнэт хотыг хөгжүүлэх асуудлыг үе шаттай хэрэгжүүлж байгаа. Өнөөдөр Засгийн газрын хуралдаанаар Орхоны хөндийд шинэ Хархорин хот барих УИХ-ын тогтоолын төслийг боловсруулж, Засгийн газраас УИХ-д өргөн барьж байгаа. Орхоны хөндий Монгол Улсын газар нутгийн олон эзэнт гүрнүүдийн суурин байсан. Тэгэхээр түүх, соёлын дурсгалт газар гэсэн үг. Хот барих тогтоолын төслийг УИХ-д өргөн барина. УИХ-аар батлагдсан ч гэлээ богино хугацаанд шийдвэрлэх асуудал биш. Бидэнд газрын байршил, ТЭЗҮ, хөрөнгө оруулалтыг боловсруулж судлах ажлууд бий. Тиймээс судалгааны ажил эхлүүлэх тогтоолын төслийг УИХ-д өргөн барьсан юм" гэлээ.