“Эрдэнэт” үйлдвэрийг Өмнөд  Африкийн "Стандарт" банкны барьцаанд тавьж, 110 сая ам.долларын  зээл авсан “Жаст”-ын захирал асан Ш.Батхүүд 10 жилийн хорих ял оноожээ. Түүнд холбогдох шүүх хурал Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхэд болсон. Шүүхээс "Эрдэнэт" үйлдвэрийн гүйцэтгэх захирал асан Ч.Ганзориг, тус үйлдвэрийн хуулийн хэлтсийн дарга асан Б.Мөнхжаргал, "Алтжин" группын үүсгэн байгуулагч агсан Г.Алтжин, түүний хүү Э.Сүрэн нарыг гэм буруутайд тооцсон аж.

     Тэд учруулсан хохирлоо нөхөн төлөх тав хоногийн завсарлага авсан бөгөөд уг хугацаа нь өчигдөр дуусаж, ял оноох шүүх хурлаа үргэлжлүүлжээ. Ингээд шүүхээс Ш.Батхүүд Эрдэнэт үйлдвэрт учруулсан 105, бусад ААН-д учруулсан дөрвөн тэрбум, нийлээд 109 тэрбум төгрөгийг нөхөн төлүүлж, 10 жил хорих ялаар шийтгэжээ. Харин Ч.Ганзориг, Б.Мөнхжаргал нарт үйлдвэрт учруулсан хоёр тэрбум төгрөг төлүүлэх, Э.Сүрэнгээр 35 сая төгрөг төлүүлэх шийдвэр гаргажээ.