Тэтгэврийг таван жилээр тогтоолгохыг ахмадууд Сүхбаатарын талбайд тайван жагсаал хийж байна. Энэхүү жагсаалын тэтгэврийн таван жилээр тогтоох тухай хууль санаачилсан УИХ-ын гишүүн Б.Пүрэвдорж зохион байгуулж байгаа юм.

Тэрбээр “Хоёр жилийн хугацаанд долоо биш таван жилээр тэтгэвэр тогтоолгох хуулийн төслийг УИХ-ын таван гишүүн өгөн барьсан. Гэвч өнөөдрийг хүртэл хэлэлцэхгүй хойшлуулж байна. 2017 онд МАН Олон улсын валютын сангийн хөтөлбөрт орсноор нэлээн хэдэн санхүүгийн, эдийн засгийн арга хэмжээ авахаар үүрэг авсан. Эмч, багш мэргэжлээр ажиллаж байгаа иргэд 100-150 мянган төгрөгөөр тэтгэвэр тогтоолгож байна. Тэтгэвэр бол та бидний ирээдүйд үлдээж байгаа хадгаламж. Төр бол хадгалах үүрэгтэй. Монгол Улсынхаа төлөө насаараа ажилласан хүмүүст тэтгэвэрт гарахад нь бага тэтгэвэр өгч хатуу хандаж байна. Энэ хуулийг батлах юм бол нийгмийн даатгалын сан хоосорно гэж ярьдаг нь ташаа ойлголт юм” гэв.