Дархан-Уул аймгийн “Оюуны ирээдүй” цогцолбор сургуулийн А байрны нэг давхарт ямар нэгэн хий цацагдсанаас сурагчид болон багш, ажилчид эмнэлэгт хүргэгдэж эмчлүүлж байгаа талаар бид өмнө нь мэдээлсэн.

      Тэгвэл хяналт, шалгалтын явцад урьдчилсан байдлаар гарсан дүгнэлтийг Дархан-Уул аймгийн Засаг даргын орлогч Жавхлан танилцууллаа. Тэрбээр “Сургуулийн их завсарлагааны үеэр мэргэжлийн байгууллагат ахуйн газ алдлаа гэх дуудлага ирсэн. Дуудлагын дагуу цагдаагийн байгууллага, онцгой байдлын газар, тагнуулын байгууллагууд ажилласан.  Ингээд хяналт шалгалтын ажил үргэлжлэн явагдаж байна. Харин анхны мэдээллээр ирсэн сургуулийн гал тогоо ахуйн газ алдсан гэх мэдээлэл худлаа байсан нь тогтоогдсон гэдгийг албан ёсоор мэдэгдэж байна. Харин тус сургуулийн сурагч нулимс асгаруулагч, амьсгал боогдуулагч цацсан байж болзошгүй талаар цагдаагийн байгууллага шалгаж байна. Энэ нулимс асгаруулагч бодис нь хоромхон зуурт хүний амьсгал боогдуулж, нулимс асгаруулах аюултай. Тиймээс ямар нэгэн байдлаар ахуйн газ алдсан гэх мэдээлэл худлаа. Сургуулийн орчинд багш, сурагчдад эрүүл мэндийн байгууллага шуурхай арга хэмжээ авч ажиллаж байна. Эцсийн байдлаар дүгнэлт гаргахаар шалгалтын ажиллагаа үргэлжлэн явагдаж байгаа” гэв. 

        Мөн Цагдаагийн ерөнхий газрын мэдээлснээр “Дархан-Уул аймгийн Дархан сумын Оюуны ирээдүй сургуулийн А байранд газ алдсан юм шиг байна" гэсэн мэдээллийг 11-р сарын 08-ны 11:05-д авч шалгалтын ажиллагааг явуулахад тус сургуулийн 12 дугаар ангийн сурагч эрэгтэй “С, эмэгтэй “Э” нар нь БНХАУ д үйлдвэрлэсэн байж болзошгүй хаяг шошготой харуул хамгаалалтын зориулалт бүхий нулимс асгаруулагч гэх цацлага их завсарлагааны үеэр нэг давхарын цайны газрын кордиорт нэг удаа цацсан байдал нь камерийн бичлэг болон эд мөрийн баримтыг хогийн саванд хаяснаа өөрсдөө зааж өгсөн байдлаар тогтоогдсон” гэлээ.