Тэтгэврийг таван жилээр тогтоолгохыг ахмадууд Сүхбаатарын талбайд тайван жагсаал хийж байна. Энэхүү жагсаалын тэтгэврийн таван жилээр тогтоох тухай хууль санаачилсан УИХ-ын гишүүн Б.Пүрэвдорж зохион байгуулж байгаа юм. Энэ үеэр УИХ-ын дэд дарга С.Одонтуяа санал бодлоо илэрхийллээ.

Тэрбээр “Олон хүн ирсэн байгааг хараад энэ хуулиа батлуулах юм шиг мэдрэмж төрлөө. Бид аль болох төрийн ордонд асуудлаа шийдвэрлэхийг хичээдэг. Гэсэн ч энэ тэтгэврийн шинэчлэлийн асуудлыг шийдвэрлэхийн төлөө та бүхний дэмжлэг хэрэгтэй боллоо. Улс орныхоо төлөө ажиллаж байсан хүмүүс тэтгэвэр авдаг. Гэхдээ авсан тэтгэвэр нь хүрэлцэхгүй байна. Үндсэн хуулиар эрэгтэй, эмэгтэй хүмүүс ижил эрх эдлэх талаар заасан байдаг. Гэтэл энэ хуулиар эмэгтэйчүүдийн хувьд долоон жилээр тасралтгүй нийгмийн даатгал төлнө гэдэг байх боломжгүй. Эмэгтэйчүүдийн ажлын байр 2000 онд 69 хувь байсан бол өнөөдөр 49 хувьд хүрчихсэн. Эмэгтэйчүүдийн тэтгэврийг өндөр тогтоолгохын төлөө чадах бүхнээ хийнэ. Эрх баригчдад мөнгө байгаа, энэ мөнгийг тэтгэвэр авах иргэддээ өгмөөр байна. Залуучуудын халамжаар угжиж, ажил хийж сургахгүй байна. 2021 онд гэхэд 2.5 сая хүн халамжид хамрагдсан байна.  Мөн халамж шаардлагатай тэтгэврийн насныхан, хөгжлийн бэрхшээлтэй, хүүхдээ хардаг хүмүүст халамжийг нь өгье” гэв.