Сарны бүтэн хиртэлт өнөөдөр болно. Тэгвэл үүнтэй холбоотой цахим сүлжээнд "Сар хиртэлтийн үед мацаг барих, зул өргөх ёстой, хиртэж байх үед нь сар луу харж болохгүй" гэсэн мэдээллүүд гараад байна. Бид энэ мэдээлэлтэй холбогдуулан Одон орон судлаач Б.Батбаяраас тодрууллаа.

   “Энэ сар хиртэлт нь 16:02:15 цагт эхлэх бөгөөд оргил үе нь 18:59:11 цагт бөгөөд 21:56:09 бүрэн дуусах юм. Нийт хиртэлт 5 цаг 54 минут үргэлжилнэ. Дараагийн сарны бүтэн хиртэлт нь 2025 оны гуравдугаар сарын 13-14-нд тохиох юм.  Сар хиртэлт болох үед мацаг барих болон бусад зан үйлийг хийдэггүй. Энэ бол оддын хөдөлгөөн шүү дээ. Цахим орчинд сар хиртэлттэй холбоотой хуурамч мэдээлэл их түгээд байна.

     Мөн хиртэлт дэлхийн бөмбөрцгийн Хойд Зүүн Европ, Ази, Австрали, Хойд Америк, Өмнөд Америкийн ихэнх хэсэг, Номхон далай, Атлантын далай, Энэтхэгийн далай, Хойд туйл, Антарктид орчим ажиглагдана. Улаанбаатар хотоос тод харах боломж тааруу 18 цагийн үед бага зэрэг харах боломжтой ”гэв.