Засгийн газрын ээлжит хуралдааны үеэр Засгийн газрын Хэрэг эрхлэх газрын дарга Д.Амарбаясгалан мэдээлэл өглөө. Тэрбээр “Энэ оны 204 дүгээр тогтоолоор Засгийн газрын авто бааз, улсын төсөвт үйлдвэрийн газрыг өөрчлөн зохион байгуулах, бүтцийг оновчтой болгох арга хэмжээг авах үүрэг чиглэл өгсөн. Миний ахалсан ажлын хэсэг үндсэн үйл ажиллагааг зохион байгуулж, Төрийн өмчит аж ахуйн тооцоот үйлдвэрийн газар болгон өөрчлөхөөр боллоо. Авто бааз нь 164 тээврийн хэрэгсэлтэй, 210 орчим ажилтан албан хаагчтай, жилдээ улсын төсвөөс 3-3.2 тэрбум төгрөгийн санхүүжилт авдаг байсныг 100 автомашинтай, 105 ажилтантай, төсвөөс санхүүждэггүй аж ахуйн тооцоон дээр үйл ажиллагаа явуулна. Төрийн хэмнэлтийн хуулийн дагуу автомашины дуудлагын үйлчилгээ үзүүлнэ. Орон нутагт Засгийн газрын томилолтыг бүрэн хариуцаж ажиллах чиг үүрэгтэй байгуулж байна. Орчин үеийн менежментээр үйл ажиллагаагаа явуулна.

    Төсвөөс гарч буй автомашинд зориулсан урсгал зардлыг 90 орчим хувиар хэмнэх боломж бүрдэж байна. Төрийн өмчийн бодлого, зохицуулалтын газарт нийт 250 автомашиныг хураан төвлөрүүлсэн. Ойрын хугацаанд 250 машиныг төвлөрүүлнэ. Нэг ёсондоо 509 машиныг хураана. Хэмнэлтийн хуулийн дагуу эмнэлэг, ОБЕГ, ЦЕГ, ХХЕГ, ГЕГ гэсэн газарт тарааж өгнө. Төрийн байгууллагууд авч ашиглах боломжгүй автомашиныг дуудлага худалдаагаар худалдана. Нийт 23 автомашиныг 120 гаруй сая төгрөгөөр үнэлж, дуудлага худалдаанд оруулсан. Дуудлага худалдааны үнэлгээ 370 сая төгрөгт хүрсэн. Үлдсэн автомашиныг орон нутаг болон төрийн байгууллагад шилжүүлнэ. Ингэхдээ УИХ-аар оруулж, баталсны үндсэн дээр шилжүүлэх юм" гэлээ.