Хөвсгөл аймгийн Бүрэнтогтох сумын Их-Уул багийн Цахир гэх газар голын ойролцоо нутаглаж байсан дөрвөн айл үерийн усанд автсан тухай дуудлагаар тус сумын хэсгийн төлөөлөгч, цагдаа нар түргэн шуурхай ажиллаж, 0-11насны дөрвөн хүүхэд, 22-33 насны хоёр эмэгтэйг үерийн уснаас гаргасан байна. Иргэдийг үерийн аюулаас хэрхэн аварсан, нөхцөл байдал ямар байсан талаар тус сумын хэсгийн төлөөлөгч, ахлах дэслэгч Д.Сэнгэравдангаас тодрууллаа.

       Тэрбээр “ Өчигдөр 17:00 цагийн үед Цахир толгой гэдэг газар дөрвөн айл усанд автсан тухай дуудлага мэдээлэл ирсэн. Үүний дагуу цагдаагийн байгууллагынхан очиж, иргэдийг уснаас аварсан. Биднийг очиход хамгийн наад талын айлын хаяагаар үерийн ус арай ороогүй байсан. Тэднийхийг ус орохоос өмнө буулгаж, аюулгүй болгосон. Голын түвшинд хамгийн ойр байгаа айлын дунд  бүслүүрээс дээгүүр ус орчихсон байсан. Ус ороогүй товгор газар нэг гэр, нэг байшин байсан. Байшинд төрөөд сар болоогүй нялх биетэй ээж, хүүхэдтэйгээ байсан. Харин үерт автсан гэрт 3-11 насны гурван хүүхэд ээжтэйгээ гэрээсээ гарчихсан байсан. Эхний ээлжид иргэдийг үерийн уснаас гаргаж, аймгийн төв рүү явуулсан. Тухайн үед гэрийн эзэд хадланд явчихсан, эзгүй байсан.  Одоогоор иргэдийн сэтгэл зүй ямар байгаа талаар хэлж мэдэхгүй байна.  

   Өнөөдрийн байдлаар усны түвшин нэмэгдэж, хуурай байсан газарт үерийн ус орж ирсэн байна лээ. Үерт автсан газар иргэн Б-ийн 200 гаруй бага мал, гурван гэр, нэг автомашин, нэг байшин усанд автаж, аврах боломжгүй байгаа. Холбогдох байгууллагуудад мэдэгдэж, эд хөрөнгө авран хамгаалахаар аймгийн Онцгой байдлын газар ажиллаж байна. Мөрөн голын түвшин савнаасаа хальж, хоёр талын далан сэтэрчихсэн эрсдэлтэй нөхцөл онцгой байдлынхан ажиллаж байна. Бид үерийн аюулаас дөрвөн хүүхэд, хоёр эмэгтэйг аварсандаа баяртай байна” гэлээ.