Чингэлтэй дүүргийн 17 дугаар хороонд өнгөрсөн жил байгуулсан уулын фитнесийг татан буулгах шийдвэр тус хорооны Засаг дарга гаргажээ. Уг фитнесийг тус хорооны хэсэг залуус үзэл бодлоороо нэгдэж, чөлөөт цагаа зөв боловсон өнгөрүүлэх зорилгоор байгуулсан байна. Харин  тухайн фитнес нь стандартын шаардлага хангаагүй, олон хүн цуглаж, байгаль орчин  бохирдуулдаг учир тус хорооны Засаг дарга В.Хүрэлбаатар эсэргүүцэж, буулгах шийдвэр гаргасан аж.

  Тэрбээр “Тэдний фитнес хэмээн нэрлэдэг стандартын шаардлага хангаагүй газар иргэд олноор цугларч, архидан согтуурч, гэмт хэрэг их гардаг. Саяхан хүчингийн хэрэг гарсан. Мөн байгалийг сүйтгэж, ногоон байгууламжийг шороогоор нь эргүүлж, маш их хог хаядаг. Түүнийг нь өдөр бүр дүүргийн хороо, цагдаа, нийтийн эргүүлийнхэн очиж цэвэрлэдэг. Би анх фитнес байгуулсан залууст “Стандартын шаардлага хангаж, өөр газар фитнес нээ. Хэрвээ тэгвэл би та нарт тусалж, хэрэгтэй тоног төхөөрөмж авч өгье” хэмээн газар зааж өгсөн.

Гэвч бүгдээрээ нийлж над руу дайраад  “Чи газарт шунаж, биднийг хөөж байна. Залуучуудаа дэмжсэнгүй” гэдэг. Өнгөрсөн жил намайг эзгүй байхад Чингэлтэй уулын өвөрт фитнес нэртэй газар нээж, олныг цуглуулсан байсан.Түүнээс хойш өнөөдрийг хүртэл тэмцэж байна. Энэ хэргийг цагдаагийн газар шалгаж байгаа” гэлээ.

           Харин энэ талаар фитнес нээсэн залуучуудаас тодруулахад “Бид найзуудаараа нийлж, хэнээс ч мөнгө гуйлгүй өөрсдийнхөө хүчээр фитнес нээсэн. Гэтэл Чингэлтэй дүүргийн 17 дугаар хорооны Засаг дарга биднийг эсэргүүцэж байна. Богд ууланд өдөрт хэчнээн мянган хүн гардаг шүү дээ. Харин манай фитнест 100 орчим хүн ирдэг. Хорооны Засаг дарга гаргасан шийдвэрээ эргэж хараасай гэж хүсэж байна” гэв.