-Амны хаалт, хамгаалалтын хувцас, хормогч, улавч, малгайн нөөц хангалттай байгаа-

Коронавируст халдвар гарсан цагаас хойш  амны хаалт, хамгаалалтын хувцас, улавч, малгай, бээлий, гар ариутгагч зэрэг халдвар хамгааллын дэглэм баримтлахад шаардлагатай бүтээгдэхүүн хүн бүрд хэрэгтэй болсон. Дээрх шаардлагатай бүтээгдэхүүнийг манай улсад “Мөнхийн тун” ХХК үйлдвэрлэж, аж ахуйн нэгж байгууллага, иргэдэд хүргэдэг юм. Тиймээс “Мөнхийн тун” ХХК-ийн ТУЗ-ийн дарга Д.Батхишигээс тэдний үйлдвэрлэдэг бүтээгдэхүүний нөөц, хүртээмжийн талаар тодрууллаа.

-Танай компани  цар тахлын үед хэрэглэх ямар бүтээгдэхүүн үйлдвэрлэж байна вэ?

-Эрүүл мэндийн яам болон бусад аж ахуйн нэгж байгууллагын захиалгаар  хамгаалалтын хувцас, амны хаалт, улавч, малгай, хормогч, гар ариутгагч зэргийг хийж байгаа. Хоногт 100 мянган амны хаалт үйлдвэрлэдэг. Улавч, малгай 2000 ширхэг, хормогч 3000 ширхгийг үйлдвэрлэж байна. Захиалгын дагуу шаардлагатай бүх газар хүргэж үйлчилдэг.

-Амны хаалт ямар үнэтэй зарагдаж байна вэ. Нөөц ямар байгаа вэ?

-Манайх бүтээгдэхүүнийхээ түүхий эдийг БНСУ-аас авдаг. Амны хаалт 500 төгрөг, хамгаалалтын хувцас 28 мянга, хормогч 9500, улавч, малгай 400 төгрөгийн үнэтэй зарагдаж байгаа. Нөөц хангалттай сайн байгаа.

-Гар ариутагч, спиртийн нөөц ямар байна вэ?

-Гар ариутгагчийн спирт, ариутгалын бодис дутагдалтай байна. Спирт гарган авдаг үйлдвэрүүд будааны хомсдолд орсон гэсэн. Гэхдээ манайх бүтээгдэхүүнээ таслахгүйгээр бүх эмнэлэг, эмийн санд хүргэхийг хичээж байна. Бусад спиртийн үйлдвэрийн үйл ажиллагаа, бүтээгдэхүүний нөөц удахгүй сайжрах байх гээд хүлээж байна. Манайх гар ариутгагч бодисыг гаднын орноос авдаг. Харин  спиртээ дотоодын үйлдвэрээс авч, өөрийн үйлдвэр дээрээ нэгтгэн боловсруулж гаргадаг.

-Хөл хориотой үед бүтээгдэхүүнийхээ түүхий эдийг хэрхэн авдаг вэ?

-Эрээн дээр гацах, цаанаас оруулахгүй байх, дугаарлах зэрэг хүндрэл гарч байгаа. Гэхдээ Эрүүл мэндий яамнаас тусгай зөвшөөрөл өгсөн.  Эм, эмнэлгийн хэрэгсэл, эрүүл мэндийн бүтээгдэхүүн зэрэг тодорхой бүтээгдэхүүн оруулж ирэх боломжтой. Заасан тоо, хэмжээнд нь багтаж, дугаарлан орж ирж байна.

-Танай үйлдвэр 24 цагаар ажилладаг. Нэг ээлжинд хэдэн хүн ажилладаг вэ?

-Манай үйлдвэр амралтын өдөр ажилладаггүй, ажилчдаа  амраадаг. Бусад үед 24 цагаар ээлжилж ажиллана. Нийт 300 гаруй ажилтантай. Нэг ээлжинд 100 гаруй хүн ажилладаг. Тодорхой чиглэлийн дагуу хариуцсан ажлаа хийдэг. Үйлдвэр, эмийн сан, хүргэлт зэрэгт хуваагдаж ажилладаг. Ажилчдын унаагаар өглөө, оройдоо гэрт нь  хүргэж өгч, авдаг.