Чөлөөт бөхийн “U23” хүртэлх насны Ази тивийн аварга, 2020 оны насанд хүрэгчдийн улсын аварга шалгаруулах тэмцээний хүрэл медальт, спортын мастер Баянмөнхийн Отгонтуяатай ярилцлаа. Тэрбээр МУБИС-ийн оюутан, Зэвсэгт хүчний “Алдар” спорт, хорооны тамирчин юм.

  -Кыргызстан Улсын нийслэл Бишкек хотод зохион байгуулагдсан “U23” хүртэлх насны 2022 оны Ази тивийн аварга шалгаруулах тэмцээнд түрүүлж, Ази тивийн аварга болсонд тань баяр хүргэе.

       -Их баярлалаа.

-Өөрийгөө танилцуулахгүй юу. Аль аймгийн хүүхэд вэ. Одоо ямар сургуульд сурч байна вэ?

     -Намайг Баянмөнхийн Отгонтуяа гэдэг. Би Хөвсгөл аймгийн Рашаант суманд 2001 онд мэндэлсэн. Айлын дунд охин. Дээрээ нэг ах, хоёр эгчтэй. Доороо нэг охин дүүтэй. Манай сум олон сайхан рашаан, булагтай. Тийм сайхан нутагт төрж, өссөндөө баяртай байдаг. Би одоо МУБИС-ийн Биеийн тамирын дээд сургуульд биеийн тамирын багш, арга зүйч мэргэжлээр суралцаж байгаа. Ирэх хавар төгсөх тавдугаар дамжааны оюутан.

-Энэ жилийн Азийн аваргын онцлог юу байв. Манай улсаас хэдэн тамирчин оролцов. Ямар амжилтуудыг гаргасан бэ?

        -Киргизстан Улсын нийслэл Бишкек хотод “U23” хүртэлх насны  Ази тивийн аварга шалгаруулах тэмцээн болсон. Манай улсаас арван тамирчин оролцож хоёр алт, хоёр хүрэл медаль хүртсэн амжилт гаргасан.

-Хэдэн барилдаан хийж, Ази тивийн аварга болов оо?

-Энэ удаагийн Ази тивийн аваргад би гурван барилдаан хийж, Ази тивийн аварга болсон.

-Азийн аваргаас өмнө олон улс, тив, дэлхийн тэмцээн, уралдаанд оролцож байсан уу?

      -Хамгийн анхны оролцож үзсэн олон улсын тэмцээн гэвэл ОХУ-ын Красноярск хотод болдог олимп, дэлхийн аварга, алдарт бөх Иван Ярыгины нэрэмжит чөлөөт бөхийн олон улсын “А” зэрэглэлийн “Алтан гран при” тэмцээн. Медаль хүртсэн анхны олон улсын тэмцээн гэвэл Азийн хүүхдийн их наадмаас мөнгөн медаль авч байсан.

-Энэ жилийн “U23” хүртэлх насны Азийн аваргад Ц.Хосбаяр багштайгаа цуг явсан уу. Хамгийн хүчтэй өрсөлдөгч ямар улсын тамирчин байв аа?

    -Тийм ээ. Гавьяат дасгалжуулагч Ц.Хосбаяр багштайгаа цуг явсан. Энэ нь миний давуу тал болсон болов уу. Хамгийн хүчтэй өрсөлдөгч гэвэл эзэн орон Киргизстаны тамирчин Арук Кадырбек Кызытай байсан. Түүнтэй хийсэн барилдаан хамгийн хүнд барилдаан байлаа.

-Монголын хөнгөн жингийн бөхчүүд амжилтаараа дэлхийд дээгүүрт ордог. Дэлхийн медальтай шилдэг бөхчүүдтэй өрсөлдөж, насанд хүрэгчдийн улсын аваргаас хүрэл медаль хүртэнэ гэдэг амаргүй. Улсын аваргад хэн, хэнтэй таарч барилдав аа?

     -2020 оны насанд хүрэгчдийн улсын аварга шалгаруулах тэмцээнд 55 кг-ын жинд барилдаж хүрэл медаль хүртэж байлаа. Зооны аваргын төлөөх барилдаанд “Хүч” спорт хорооны Б.Хатантуул эгчтэй таарсан. Бидний барилдаан эн тэнцүүхэн болсон. Барилдаан 1:1-ийн харьцаатай өндөрлөж, сүүлд авсан оноогоор Б.Хатантуул эгч ялж, би хожигдол хүлээсэн. Хэрэв түүнийг ялсан бол алтан медалийн төлөө барилдах байлаа. Тэгээд л хүрэл медалийн төлөөх барилдаанд ялалт авч медаль хүртсэн.

-Чиний бэлтгэлийн хамтрагч ямар бөхчүүд байдаг вэ. Танай “Алдар” спорт хороонд 55 кг-д сайн барилддаг нэлээн хэдэн бөх бий байх аа?

      -Миний бэлтгэлийн хамтрагчид хэн, хэнийхээ бэлтгэлийг бүрэн хангаж өгдөг мундаг охид бий. Бэлтгэлийн найз Оюундарь, Мөнхнаран, Г.Отгонжаргал эгч, Саруул дүү, Эрдэнэ-Очир гээд дурдвал зөндөө олон бэлтгэлийн хамтрагчид байгаа.

-Өөрөө их даруухан харагддаг. Дэвжээнд гарахдаа эрс өөрчлөгдөх юм аа.  Хаанаас тийм эрч хүч гардаг юм бол оо?

      -Манай ах, эгч, дүү, бүгд л даруухан хүмүүс байдаг. Аав маань их дөлгөөн, тайван, даруухан, дуу цөөтэй хүн. Харин би дэвжээн дээр даруухан байхыг боддоггүй. Барилдаан эхэлсэн л бол өөрийн хийж чадах бүх зүйлийг дайчлан гаргахын хичээдэг л дээ. Бүх хүч чадал, нөөц боломжийг шавхан гаргаж барилддаг. Барилдах гэдэг тэмцэл шүү дээ.

Тэмцэлд ялахын тулд унжгар, сул дорой байж болохгүй гэж бодоод өөрийгөө хурцалж, ирлээд л дэвжээнд гардаг.

-Бага байхдаа ийм даруухан охин байсан уу. Аль эсвэл эсрэгээр хөдөлгөөнтэй байв уу?

    -Тийм ээ. Би багын л дуу цөөтэй хүүхэд байлаа. Хүний урдаас ч эгцлэн харж чадахгүй шахам даруухан охин байв. Улаанбаатар хотод  наймдугаар ангид ордог жилээ шилжиж ирсэн. Том эгч Мөнхтуяа маань намайг “Цоглог” төвийн бүжгийн дугуйланд оруулж өгсөн юм. Бүжгийн дугуйланд яваад нэг сарын дотор асар их өөрчлөлт гарсан. Ичимхий бүрэг, даруухан зан бага багаар арилж, “нүүр хагарч” өөрийгөө нээн, илэрхийлж чаддаг болсон. Бүжгийн спорт их сонирхолтой байлаа. Олон сайхан найз, нөхөдтэй болж, бусадтай чөлөөтэй, нээлттэй харилцдаг болсон шүү.

-Бүжгийн спортоор хичээллэж байсан охин яагаад чөлөөт бөхийг сонгох болов?

         -Нагац эгч маань үеэл бид хоёрыг 2016 оны гуравдугаар сард “Алдар” спорт хорооны Ц.Хосбаяр багшийн шавь болгон дугуйланд нь оруулсан юм. Харин бөхийн спорт сонирхдоггүй, барилдах дургүй л байсан л даа. Дуртай, дургүй хоёрын хооронд л явдаг байв. Ц.Цогтбаяр багш надад хэлж байсан нэг үг бий. “Чамд бол гоншигнох зохихгүй. Харин юу ч болсон шүд зуун тэвчих л зохино” гэж хэлсэн. Би багшийн тэр хэлсэн үгийг үргэлж санаж, эцсээ хүртэл шүд зуугаад л тэмцэж барилддаг болсон. Түүнээс хойш бяцхан зүрхэндээ том мөрөөдөл тээж бэлтгэлээ хийж байгаа.

-Ярилцсанд баярлалаа.

-Баярлалаа.