Багш нар цалингаа 3.5 сая төгрөг болгож нэмүүлэхээр ажил хаяад гурван долоо хонолоо. Өнөөдөр ерөнхий боловсролын сургуулийн сурагчид хичээлдээ явж чадалгүй цоожтой хаалганы цаана үлдэв. Араас нь эмч нар цалингаа нэмүүлэхээр Төв талбайд жагсаж эхлээд байна.

       Багш, эмч нарын шаардлагыг улс төрийн дуулиан дунд юман чинээ тоож байгаа улстөрч алга үнэндээ. Улстөржиж гүйгээд ирээдүйгээ боддоггүй юм бол улсаараа цалингаа нэмүүлэхийг шаардъя. Өнөөдөр багш, эмч гэлтгүй галын шугаманд ажиллаж байгаа төрийн алба хаагчид, онцгой байдлын ажилчид, цагдаагийн алба хаагчид бүгд бүгдийнх нь цалинг нэмэх шаардлага хэрэгцээ хангалттай бүрдсэн. Чимээгүй хөдөлмөрлөж, өргөн хэрэглээний бараа бүтээгдэхүүн өдрөөс өдөрт нэмэгдэж байгаа энэ цаг хугацаанд  авсан цалин нь амьдралынх нь хаана нь ч хүрэлцэхгүй бүлтэлцэж,  яьаа бодит амьдрал олон бий, Монголд. Цаана нь ахмадын тэтгэврийг ялгаварлахгүй нэмэх нь ч зүйд нийцнэ. Насаараа хөдөлмөрлөж, улсдаа зүтгэсэн ч авч байгаа тэтгэвэр нь амьжиргааных нь хаа ч хүрэлцэхээргүй тэтгэвэртэй хөгшчүүл олон бий.

        Сонгуулийн өмнө эрх баригчид ингэж л амлаж, иргэдийн саналыг авсан. Тодруулбал, төрийн алба хаагчдын цалинг инфляцын төвшинд уялдуулж нэмнэ гэх амлалт өгч байлаа. Гэвч өнөөдөр инфляцын хоёр оронтой тоонд орсон ч цалин, тэтгэврийн хэмжээ тэр хэмжээнд хүртлээ нэмэгдэж, иргэдийн амьдрал сайжирсангүй.

       Багш, эмч нарын цалинг нэмэгдүүлэх шаардлагад Засгийн газар хэчнээн эсэргүүцэж, шалтаг хайж байна. Багш, ажилчдын цалинг 3.5 сая төгрөгт хүрвэл улсын төсөвд 3.4 их наяд төгрөгийн ачаалал үүснэ гэж тайлбарлаж, шатлалтай нэмүүлэх санал тавьж хүртэл үзлээ. Улмаар 2.5 сая төгрөг болгож нэмэгдүүлэх хэлэлцээрийн ширээний ард Үйлдвэрчний эвлэлийнхэн өөрсдөө ирэхгүй байна гэж бусдад бурууг тохох гэж ч оролдож үзэж байна. Үнэндээ боловсрол, эрүүл мэндийн салбараа сайжруулъя гэвэл цалинг нь нэмэх зайлшгүй шаардлагатай гэдгийг улстөрчид, Засгийн газар мэдэхийн дээдээр мэдэж байгаа. Гэтэл өнгөрсөн хугацаанд багш ажилчдын цалинг нэмэх шаардлагад улстөрчдийн хэн нь ч дуу хоолойгоо нэгтгэж хамгаалж, өмгөөлж, дуугарсангүй.

       Өөрөөр хэлбэл, улстөрчид, УИХ-ын гишүүд өөрсдийнх нь эрх ашиг, бүлэглэлийн төлөөх асуудалд ямар хүчтэй эсэргүүцэж, акцалж, төрийн түшээдийнхээ эрх үүргийг хэчнээн  сүр дуулиантайгаар ашиглаж болдог вэ гэдгийг өнгөрсөн хугацаанд бид хангалттай  харсан. Бүүр үүр шөнөөр, өдөр шөнөгүй УИХ-ын чуулганаа хуралдуулж, баахан хууль баталдаг өчнөөн олон жишээ бий. Гэтэл багш, эмч нарын цалинг нэмэгдүүлэх асуудал  дээр УИХ суугаа 126 гишүүнээс хэн нь  эрх баригчид эсвэл Засгийн газарт хүртэл нь дуугарч, ард түмнийг төлөөлж байгаа үүргээ гүйцэтгэсэнгүй. Уг нь бол УИХ-ын гишүүд ийм л цаг үед иргэдийн саналыг авахын төлөө Засгийн газарт ийм  боломжоор багш ажилчдын цалинг нэмж, ийм хэрэгцээгүй зардлын танаж, эмч нар, цаашлаад онцгой байдал, цагдаагийн алба хаагчдын цалин хөлсийг нэмэх бүрэн боломж байна гээд улсын төсвийг улаан эрээн болтол зураад, тооцоолоод ард түмнээс оноо аваад зогсож байх байлаа.

      Гэвч түмнийг төлөөлөх үүргээсээ илүү улс төрийн дуулианд ач холбогдол өгч, улсын эрх ашгийг хойш тавьчихаад парламентын танхимыг намын дарга нарын хэрүүл  болгочихсон суугаа бодит байдалтай нүүр тулж байна. Адаглаад ирэх оны төсвийн хэлэлцүүлгээ ч өмнөх жилүүдээсээ хангалтгүй хийж байна. Өнгөрсөн жил УИХ-д шинээр орж ирсэн гишүүд төсвийн алдагдлыг бууруулах асуудалд хэчнээн ач холбогдол өгч, сүр дуулиантай улс төрийн акц хийж, олон нийтээс дэмжлэг авч байлаа. Үнэндээ тухай үед бүлэглэлүүд, улс төрд оролцоотой бизнесийнхий оролцоо байсан  учраас тэгж олон гишүүн хүч нэгтэж, нэмээд олны дэмжлэг авах хүртэл нь дуулиан болгосон гэсэн үг. Гэтэл өнөөдөрр 1.5 сая төгрөгийн цалинтай багш нар цалингаа 3.5 сая төгрөг болгохын төлөө бор зүрхээрээ тэмцэж байна.

      Цаасан дээр бичээтэй хэрэгждэггүй төсөл хэчнээн их байгааг өнгөрсөн жилүүдэд хангалттай харсан. Тиймээс шаардлагагүй хөрөнгө оруулалттаа тэвчиж, төрийн өмчит компанийн үр ашгийг сайжруулж, эдийн засгаа солонгоруулах бүрэн боломж  байлаа манайд. Түүнийхээ үр ашгаар багш ажилчдын цалинг нэмж, тэтгэвэр тэтгэмжийн хэмжээг нэмэх бололцоо хангалттай байсан ч манайх өнгөрсөн хугацаанд нүүрсний хулгай, хөгжлийн банкны дээрэм ярьсаар өнөөдөр ард иргэдийн ахуй амьдралын өөд татах, эдийн засгаа сэргээх бодлогын тухай ярьж байгаа улстөрч үзье гэсэн ч алга даа.

        Ийм л цаг үед иргэдэд өчнөөн гоё амлалт өгсөн эрх баригч намынхан, цаашлаад тойрог болон жагсаалтаар сонгогдсон УИХ-ын гишүүдээс хариуцлага нэхмээр байна. Цаашлаад улс төрийн хэрүүл маргаанаа эцэслэж, эдийн засгаа сэргээх арга хэмжээ нэн даруй авч, эмч багш ажилчид гэлтгүй бүгдийнх нь цалинг нэмье, Ерөнхий сайд аа.