Монгол Улсад кино урлаг үүсэж, хөгжсөний 90 жилийн ой өнөөдөр тохиож байна. Энэ өдрийг тохиолдуулж Монгол Улсын Ерөнхийлөгч зарлиг гаргаж, салбартаа үнэтэй хувь нэмэр оруулсан эрхмүүдийг төрийн дээд цол, одон медалиар шагнах юм. Энэ үеэр орчуулгын киноны нэрт дуу оруулагч, жүжигчин О.Оюун, Ө.Наранбаатар, тайз, дэлгэцийн чадварлаг жүжигчин С.Ариунбямба нарыг МУГЖ цол тэмдгээр шагнахаар болсон билээ. Тэдний хэвлэлд өгсөн ярилцлагын хэсгээс эшлэн хүргэж байна.

         Ардын жүжигчин А.Очирбатын охин дуу оруулагч, жүжигчин О.Оюун "...Миний аав өөрийгөө дөвийлгөх, магтах маш дургүй. Тийм хүмүүсийг ч үзэхгүй. "Чадалтай хүн аяндаа харагдана. Хийж буй ажлаас нь л хэн бэ гэдгийг нь хардаг. Хүнд зөвшөөрүүлэх гэж зүтгэх хэрэггүй" гэдэг байлаа..."

 

           Дуу оруулагч Ө.Наранбаатар "...МУГЖ цол хүртэх гэж буйгаа дуулаад шуудхан хэлэхэд тэнгэрт байгаа аав, ээж минь л бодогдсон доо. Амьд байсан бол сайхан л байж гэж бодогддог юм байна лээ. Хоёрдугаарт, 34 жил дуу оруулж байгаа хөдөлмөр зүтгэлийг минь үнэлж байна даа гэж бодсон..." 

 

           Жүжигчин С.Ариунбямба "Монголын театр, кино урлаг нэг үеэ бодвол сайхан хөгжиж байна. Хүмүүс ч маш гоё  хүлээж авдаг болж.  Ер нь урлаг хөгжихөд хүмүүсийн уран сайхны боловсрол үнэлж баршгүй үүрэгтэй байдаг. Зарим хүн үүнийг буруугаар ойлгож “муусайн урлагийнхан” гэж ярьдагт уран бүтээлчийнхээ хувьд эмзэглэдэг. Хүний оюуны талхыг бэлдэж өгдөг хүмүүсийг уран бүтээлч гэдэг. Хүн гэдэг амьтан оюунаа цэнэглэж хооллох ёстой. Тэр хоол нь уран бүтээл..."