Хавдар судлалын үндэсний төвийн захирал асан Н.Эрдэнэхүүг ажлаас чөлөөлсөн Т.Мөнхсайханы шийдвэрийг шүүхээс хүчингүй болгож, түүнийг ажилд нь буцаан томилох шийдвэр гарчээ.

        Тэрбээр таван сарын өмнө ажлаа хүлээлгэж өгөхдөө “Ажлаа хүлээлгэн өглөө. Намайг шууд чөлөөлж байгаа нь Хөдөлмөрийн тухай хуулийг зөрчиж байна. Уг нь ажлаас чөлөөлөх үндэслэл байхгүй. Сайд хэн нэгэн хүнийг чөлөөлөх тушаалыг ингээд гаргадаг болжээ. Т.Мөнхсайхан ажлаа аваад хавдрын чиглэлээр манайхтай хамтарч ажиллаж эхэлсэн. Энэ хугацаанд олон дарамт ирж, байнга ажлаа өг гэдэг байсан ч бид ажлаа сайн хийдэг байсан учраас тэгэсгээд л намждаг байсан. Тиймээс би шүүхэд хандана. Нэгдүгээр сараас хойш хавдрын чиглэлээр Эрүүл мэндийн яам дөрвөн талт гэрээг байгуулж шинэ эмийг хандиваар оруулж ирсэн. Улмаар ЭМЯ-ны хүмүүс манай төв дээр ирээд эмийн татварт 500 сая төгрөг өгөхийг шаардсан. Өөрийг нь хүссэн зүйлийг хийгээгүйн төлөө би ажлаа өглөө.  Би ажилласан хугацаандаа сэтгэл хангалуун байгаа учраас бардам гарч байна" гэж байсан юм.

Тэгвэл тэрбээр шүүхдэж, ажилгүй байсан хугацааны цалингаа авч, нийгмийн даатгалаа төлүүлэхээр болсон байна.

        Энэ талаар Н.Эрдэнэхүү эмчээс тодруулахад “Үндсэн тав, зургаан сар ажилгүй байлаа. Ямартай ч шүүхийн шийдвэр үнэн зөвөөр гарч, хууль бус байсан нь тогтоогдлоо. Шүүхийн шийдвэр албажиж эхэлсэн учраас ямар нэгэн сайдын тушаалгүйгээр би хуучин ажлаа хийж болох юм билээ. Өөрөөр хэлбэл, ХСҮТ-ийн захирлын албан тушаалдаа томилогдож болно гэсэн үг. Гэхдээ би бодож байна, хэрхэх эсэхээ. Энэ байгууллагыг залуучууд нь аваад явсан дээр биз дээ” гэлээ.