МАН-ын удирдах зөвлөлийн хурал Тусгаар тогтнолын ордонд болж байна. Энэ үеэр МАН-ын Ерөнхий нарийн бичгийн дарга Я.Содбаатар сэтгүүлчдэд мэдээлэл өглөө. Тэрбээр “Намд үүсээд буй улс төрийн нөхцөл байдал, МАН-ын бүлэгт үүсээд байгаа асуудлын талаар ярилцаж, хуралдлаа. Тиймээс дээрх асуудлуудыг шийдвэрлэх Ажлын хэсэг гаргаж, тэдэнд хоёр хоногийн дотор үл ойлголцол бий болоод байгаа асуудлыг тодорхой болгох үүрэг, чиглэлийг өгсөн. Удирдах зөвлөлийн хурлаар МАН-ын бүлэг, дотоод асуудал ярихаас гадна нийгэмд үүсээд буй нөхцөл байдал, улсын төсвийг хугацаанд нь батлах асуудлыг мөн ярилцлаа. Энэ үеэр Ерөнхий сайд шатахууны хомсдол, гадаа жагсаж байгаа эмч, багш нарын ажил хаялттай холбоотой асуудлуудын талаар мэдээлэл өгсөн. Тиймээс ойрын өдрүүдэд энэ бүх асуудлыг шийдвэрлэх ёстой гэж үзэж байгаа. УИХ-ын даргын томилгоо, парламентийн даргын томилгоо бол хуультай. МАН-ын аливаа шийдвэрүүд хуулийн хүрээнд явах ёстой. Тэр утгаараа МАН-ынхан хоёр хуваагдаж, талцаад нэлээн хугацаа өнгөрсөн учир хоорондоо ойлголцож, уулзах боломжийг нээх үүднээс хуралдсан. Ажлын хэсгийн ахлагчаар Ч.Хүрэлбаатар ажиллана. Түүнд С.Баяр, М.Энхболд Ц.Нямдорж, Н.Энхбаяр гээд төр, нийгмийн зүтгэлтнүүд орж, МАН-д үүсээд байгаа асуудлыг ярьж байгаа. МАН арваннэгдүгээр сарын 15, 16-ны өдөр намынхаа 31 дүгээр хурлыг хийх ёстой. МАН дөрвөн жилд нэг удаа ээлжит хурлаа хийдэг. Энэ хурлын дараа намын даргын асуудал болон бага хурлын даргын асуудлыг, намынхаа хяналтын байгууллагын асуудлыг хэлэлцэх ёстой. МАН энэ дүрмийн хүрээнд МАН-ын даргын асуудал яригдана” гэлээ.