• Өнөөдөр 2026-02-22

ҮНЭ ХАНШ: Хонины цул мах кг нь 14500, үхрийн цул мах кг нь 20000 төгрөг болж өсжээ

2025-10-28,   2046

      "Махны үнэ нэг ирэхэд л өсчихсөн байдаг. Манайх ихэвчлэн Эмээлтээс махаа авдаг болохоор Хүчит шонхор зах руу ирэх нь бага. Хоёр сарын өмнө ирэхэд хонины цул мах кг нь 13500, үхрийн цул мах кг нь 18000 байсан бол өнөөдөр 1000-2000 төгрөгөөр өссөн байна. Шатахуун, түлшний үнэ өсөөд, олдохгүй байхад махны үнэ өсөх нь энүүхэнд байлгүй. Ард иргэдээ арай л туйлдуулж байна даа” гэж “Хүчит шонхор” захаас мах аваад гарч буй 40 гаруй насны иргэн ярьж байна. Бид энд махны үнэ ямар байгааг сурвалжлахаар ирээд байгаа нь энэ.

   Биднийг 15:00 цагийн орчимд тус захад ирэхэд хүний хөдөлгөөн харьцангуй бага байх бөгөөд лангуун дээрх махнууд дуусах тийш хандаж, хонины мах дийлэнх үлдсэн байв. Оронгуут л эхний худалдагч эмэгтэй “За ямар мах сонирхож байна. Хонины цул мах, ястай гээд байна шүү” гэлээ.

 
    Бид ч шуудхан үнэ ханшийн мэдээлэл асуув. Худалдагч “Хонины цул мах 14000, ястай нь 13500” гэснээ “Өнөөдөр ирсэн шинэ мах шүү” гэж нэмж хэлнэ. Цааш явахад, мөн л хонь, ямаа, үхрийн мах зарж байгаа лангуунууд байх бөгөөд хонины цул мах 14000-14500, ястай нь 13000-13500, ямааны цул мах 12500-13000 төгрөг, ястай нь 12000 гэж байлаа.
   Харин биднийг очиход үхрийн мах ховор байсан бөгөөд худалдагчаас “Үхрийн мах энд хэдтэй байна” гэхэд, “Янз бүр. Үхрийн цул мах 17500 төгрөгөөс эхэлж байгаа” гэсэн юм. Үнэ өөрчлөгдсөн талаар бид үхрийн мах сонирхож, худалдан авалт хийх гэж яваа бололтой иргэнээс "Үхрийн мах 20000 хүрчихэж. Хүчит шонхор захын өнөөдөр гаргасан үнийн мэдээлэлтэй танилцахад цул мах 20000 гэж байна. Та асууж үзэв үү, хэдээр авах юм шиг байна" гэхэд, "Үхрийн мах бараг л дуусчихаж, хойд талын лангуун дээр цулаар нь зарж байна. Үнийн хувьд 19000-20000 гэнэ. Ах нь сая долоо хоногийн өмнө шахам ирэхэд дээд тал нь 17500 байсан. Нэмэгдчиж, шатахууны үнэ өссөнтэй холбоотой байх" гэж байв.
 
    Тус захад харин хонины сүүл 12000 төгрөг, гулууз мах 10000-12500 төгрөгөөр борлуулагдаж байгааг худалдаачид онцолж байлаа. Биднийг ийн зогсох үеэр хонины цул махнаас 50 мянган төгрөгт авсан иргэн Д “Махны үнэ арай л дэндүү өсөж байна аа. Тэгээд үнэтэй болохоор багаар авсан мах хоёр хоноод л дуусчих юм. Уг нь өглөө эрт ирээд гулуузаар нь авчихаар амар байдаг юм. Одоо ч хонь, үхрийн мах идэх аргагүй болжээ. Гэрийнхээ ойролцоох дэлгүүрээс авья гэхээр бүр хэд дахин үнэтэй. Арай гэж бөөнийх нь захаас дундаж үнээр нь авья гэхээр нэмэгдчихсэн байдаг” гэнэ.
     Нийслэлийн статистикийн газрын энэ оны аравдугаар сарын 20-ны өдрийн махны дундаж үнийн судалгаагаар “Хонины ястай мах кг нь 15798, хонины цул мах кг нь 16409, үхрийн ястай мах өмнөх долоо хоногтой харьцуулахад, 0.28 хувиар буюу  56 төгрөгөөр өссөн, үхрийн цул махны үнэ өмнөх долоо хоногтой харьцуулахад 0.47 хувиар буюу 111 төгрөгөөр өссөн байна. Адууны ястай махны үнэ өмнөх долоо хоногтой харьцуулахад 0.24 хувиар буюу 33 төгрөгөөр буурсан, ямааны ястай мах кг нь мах дунджаар 14.133 төгрөг байна” гэж мэдээлсэн. Харин өнөөдөр “Хүчит шонхор” зах дээр махны үнэ ийм байна.

ҮНЭ ХАНШ: Хонины цул мах кг нь 14500, үхрийн цул мах кг нь 20000 төгрөг болж өсжээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.