Биоэнергийн судалгаа эмчилгээний үндэсний хүрээлэнгийн 25 жил, "Альтернатив" эмнэлгийн таван жилийн ойд зориулсан улс, аймаг, цэрэг, сумын цолтой 128 бөхийн барилдаанд Ховд аймгийн Буянт сумын харьяат, "Аврагч" спорт хороо, -Зорчигч Тээвэр-1” ОНӨААТҮГ,  “Ховд” дэвжээний бөх, улсын аварга Оргихын Хангай түрүүллээ.  Харин Архангай аймгийн Батцэнгэл сумын харьяат, "Алдар" спорт хороо, зэвсэгт хүчний 013 дугаар анги, “Хатант Интернэйшнл” ХХК, “Суман Зурхай” ХХК, "Бөх Билэгт" дэвжээний бөх, улсын үнэн зоригт харцага Батсүхийн Зоригтбаатар үзүүрлэв.

     Шөвгийн дөрөвт Өвөрхангай аймгийн Төгрөг сумын харьяат, Барилга инженерийн цэргийн удирдах газар, "Их Монголын Хүчтэн" дэвжээний бөх, улсын арслан Ц.Бямба-Отгон, Сүхбаатар аймгийн Онгон сумын харьяат, "Хилчин" спорт хороо, хилийн цэргийн 0208 дугаар анги, “Нэгдэл” клуб, “Зорчигч Тээвэр-2” ОНӨААТҮГ, “Өрнөх цамхаг” ХХК, “Жавхлант” дэвжээний бөх, аймгийн хурц арслан Н.Өсөхбаяр нар шалгарлаа.

    Шөвгийн наймд улсын үнэн зоригт харцага Н.Золбоо, улсын харцага Э.Мөнхжаргал, улсын начин Б.Лхагвадорж, улсын начин Б.Шаравдорж нар үлдэв.  Дараагийн барилдаан аравдугаар сарын 3-ны бямба гарагт 13:00 цагаас “Нутгийн Буян” группийн 30 жилийн ойн нэрэмжит, намрын нээлтийн улс, аймаг, цэрэг, сумын цолтой 128 бөхийн барилдаанаар үргэлжилнэ.