Олимпын таеквондогийн пүмсэ төрлөөр хоёр өдрийн турш Монгол бөхийн өргөөнд зохион байгуулагдсан БНСУ-аас Монгол Улсад суугаа Онц бөгөөд Бүрэн эрхт Элчин сайдын нэрэмжит "Элчингийн цом 2025" тэмцээний аваргууд тодорлоо. Тэмцээнд хөдөө орон нутгийн болон нийслэлийн 27 багийн 800 гаруй тамирчин  “А”, “В”, “С” гэсэн гурван ангилалд өсвөр үе, залуучууд, насанд хүрэгчид, мастерс гэсэн ангилалд ур чадвараа сорин өрсөлдлөө.

    Тэмцээний “А” ангилалд багийн дүнгээр эрэгтэй багуудаас аваргын цом алтан медалийг Х.Ариунаа дасгалжуулагчтай “Идэр” клубийн баг хүртлээ. Багийн дүнгээр мөнгөн медалийг С. Янжинлхам дасгалжуулагчтай “Арслан” клуб хүрэл медалийг Н.Бямбацогт дасгалжуулагчтай “Алтайн Барс” клубийн багууд тус тус хүртлээ.

    Харин эмэгтэй багуудаас аваргын цом алтан медалийг “Арслан” клуб хүртсэн бол мөнгөн медалийг “Эхлэл” клуб хүрэл медалийг “Нүүдэлчин” клубүүд тус тус хүртлээ. Тэмцээний “Шилдэг эрэгтэй тамирчин”-аар БГД “ТХТ”-ийн Ц.Шинэ-Эрдэнэ,  “Шилдэг эмэгтэй тамирчин”-аар “Эхлэл” клубийн тамирчин О. Энх-Эрдэнэ тодорлоо. “Шилдэг шүүгч”-ээр Т.Энхжин, “Шилдэг дасгалжуулагч”-аар С.Янжинлхам, Н.Бямбацогт нар тодорлоо. Ийнхүү хоёр өдрийн турш явагдсан 15 дахь удаагийн “ЭЛЧИНГИЙН ЦОМ-2025” тэмцээн амжилттай болж өндөрлөлөө.