Монголын бүх ард түмний XVI их наадмын хөнгөн атлетикийн тэмцээн есдүгээр сарын 18-20-ны өдрүүдэд болж өндөрлөсөн билээ. Тус наадамд 16 аймаг, таван дүүргийн 160 гаруй тамирчин өрсөлдсөн юм. Монголын бүх ард түмний XVI зуны их наадмын 800 м-ийн зайд 2.16.71 секунд цагийн амжилтаар мөнгөн медаль хүртэж, “Спортын мастер”-ийн болзол хангасан Дархан-Уул аймгийн тамирчин Энхмаагийн Хонгорзултай ярилцлаа.

 -Монголын бүх ард түмний XVI зуны их наадмын 800 м-ийн зайд 2.16:71 секунд цагийн амжилтаар мөнгөн медаль хүртэж, “Спортын мастер”-ийн болзол хангасанд баяр хүргэе.

       -Баярлалаа.

-Миний дүү өөрийгөө манай уншигчдад танилцуулахгүй юу?

       -Сайн байна уу, “Эргэлт”.мн сайтын үнэнч уншигч, дэмжигчдэдээ баярлалаа. Энэхүү бяцхан ярилцлагыг маань уншиж буй уншигчдад өглөө, өдөр, оройн мэндийг хүргэе. Намайг Энхмаагийн Хонгорзул гэдэг. Хөнгөн атлетикийн спортоор хичээллэдэг. Хөнгөн атлетикийн спортын мастер цолтой, залуу тамирчин байна аа.

-Дархан-Уул аймгийн деревенд төрсөн хүүхэд үү?

       -Би Дархан-Уул аймгийн Дархан суманд төрж, өссөн.

-Тосгоны 4-р дунд сургуулийн Ганболд багшийн шавь юм уу?

        -Тийм ээ, миний хөнгөн атлетикийн анхны багш спортын мастер Ж. Ганболд гэж хүн бий.

-Арван жилийн дараа багшийгаа өргөж, баяр хүргэнэ гэсэн байсан. Даах болов уу?

        -Санаж, бодож явахад болох байх аа.

-Тосгоны деревенгийн хүүхдүүд хэзээнээсээ хөнгөн атлетикаар сайн байдаг. Бага насныхаа хамгийн сайхан үеийг эргэн нэг дурсахгүй юу?

        -Тийм шүү, манай Тосгоны хүүхдүүд дундаас үе, үеийн хөнгөн атлетикийн сайн тамирчид төрөн гарсан байдаг. Миний бага насны сайхан дурсамжууд спорттой л их холбоотой. Хамгийн анх нь кросс гүйлтийн улсын аварга болж байсан үе сайхан дурсамжтай санагддаг.

-Яагаад хөнгөн атлетикийн спортыг сонгож хичээллэх болсон юм бэ?

         -Анх сургуулийнхаа намрын спартакиадад оролцож медаль авч байсан. Тэр медаль надад их урам, зориг, хүсэл тэмүүллийг өгч цаашдаа хөнгөн атлетикаар хичээллэх суурь үндэс болсон.

-Хэд дэх жилдээ хөнгөн атлетикаар хичээллэж байгаа вэ?

         -Хөнгөн атлетикийн спортоор ерөнхий боловсролын дунд сургуулийн хоёрдугаар ангид байх үеэс эхлэн хичээллэсэн. Одоо 13 дахь жилдээ хичээллээд явж байгаа.

-Хөнгөний 400 м болон 800 м-т гүйдэг гэхээр дундын зайн гүйлтийн тамирчин гэсэн үг үү. Холын зайд гүйдэг үү?

         -Өсвөр үеийн тамирчин байхдаа 3000 м, 5000 м-ийн зайд гүйдэг байсан.  Харин одоо бол 800 м буюу дундын зайд гүйдэг болсон.

-Одоо ямар клубийн хэн багшийн удирдлага дор бэлтгэл, сургуулилалтаа хийж байгаа вэ?

       -Одоо хөнгөн атлетикийн ойрын зайн “ҮЧИМБЭР” клуб дээр спортын мастер Г. Жанцандорж багшийнхаа удирдлага дор бэлтгэлээ хийж байгаа.

-Хөнгөн атлетикаар хичээллэсэн үеэс хойших томоохон  амжилтуудаасаа сонирхуулахгүй юу?

         -Хичээллэсэн үеэс хойш гэвэл өсвөр үеийн тамирчин байхдаа олон улсын марафон гүйлтийн тэмцээнд түрүүлж байсан. Энэ жил үзүүлсэн амжилтууд маань хамгийн томоохон амжилтын нэг болж байна даа.

-Сэтгэлд тань хоногшин үлдсэн, хамгийн сайхан дурсамж үлдээсэн ямар тэмцээн байдаг вэ?

       -Өсвөр үеийн улсын аварга шалгаруулах тэмцээний гүйлтийн гараанд гарах үед бороо ороод, барианд орох үед цас орж байсан нь одоо эргээд бодоход сонин, дурсамжтай сайхан санагддаг. Хамаг бие “царцаж” хөлдөх шахсан их хүйтэнд гүйгээд түрүүлсэн тэр л тэмцээнийг мартдаггүй.

-Чөлөөт цаг гарвал юу хийх дуртай вэ?

        -Чөлөөт цагаараа аль болох идэвхтэй зүйл хийх гэж хичээдэг. Гадуур алхах, найзуудтайгаа уулзах гэх мэт.

-Одоо дараагийн оролцох ямар тэмцээн хүлээж байгаа вэ?

        -Хөнгөн атлетик гадаа талбайн спорт учраас улирал нь дуусаж, тэмцээн дууссан. Гадны улс орнуудад болох тэмцээнүүдийг судалж байгаа.