Монголын чөлөөт бөхийн эмэгтэйчүүдийн 65 кг-ын жинд ирээдүйтэй, нуруулаг хоёр охин Т.Энхжин, Э.Одзаяа нар зэрэгцэн гялалзаж орж ирсэн. Тэр хоёр бие, биенээ хурцалсан, сайн өрсөлдөгчид болсон байгаа. ОУХМ Түвшинжаргалын Энхжин, МУГТ Ц.Цогтбаяр багшийн шавь, ОУХМ Эрдэнэбатын Одзаяа “Женко” клубийн МУГД Т.Сүхбаатар багшийн шавь билээ. Э.Одзаяа 2025  оны чөлөөт бөхийн “U20” ангиллын залуучуудын дэлхийн аварга шалгаруулах тэмцээний 68 кг-ын жинд хүрэл медаль хүртсэн.

    Харин Азийн аварга шалгаруулах тэмцээний хошой мөнгөн медальт, Үндэсний шигшээ баг, “Алдар” спорт хорооны тамирчин, ОУХМ Т.Энхжин 22 насандаа Хорват Улсын Загреб хотод үргэлжилж байгаа “Загреб-2025” насанд хүрэгчдийн ДАШТ-ий эмэгтэйчүүдийн 65 кг-ын жинд өрсөлдөж хүрэл медаль хүртэж, дэлхийд нэрээ данслан, дэлхийн шилдгүүдийн эгнээнд орж чадлаа.  Т.Энхжин ДАШТ-ий мөнгө, хүрэл медальт, Пан Америкийн хошой аварга, хоёр шуундаа бяртай, хүчтэй өрсөлдөгч АНУ-ын Эллен Килти барилдсан. Тун тэнцүүхэн өрнөсөн энэхүү барилдаанд Т.Энхжин 4:2-оор илүүрхэж, Монголын багийн “Загреб-2025” ДАШТ-ий гурав дахь медалийн эзэн болсон юм.

       Т.Энхжин, АНУ-ын Эллен Килтийг ялж, дэлхийн аваргын хүрэл медалийн болзол хангаад, хамгийн түрүүнд МУГТ Ц.Цогтбаяр багш руугаа гүйж очлоо. “Баярлалаа багшаа, багшдаа баярлалаа” гээд асгартал уйллаа. Ц.Цогтбаяр багш нь “За, одоо уйлахгүй шүү. Сэтгэлээ бариад, ялалтаа очиж аваад ир” гэлээ. Багш, шавь хоёрын ярилцаж байгаа нь олны хайрыг татсан сайхан, дахин давтагдашгүй гоё агшин байлаа. Т.Энхжин хэний хүчинд хаана хүрч, ямар амжилт гаргасан гэдгээ мартаагүй яваа нь сайшаалтай. Хөлс, хөдөлмөр, хичээл зүтгэлийн үнэ цэнийн амтыг тэрбээр мэдэрч байгаа нь магтууштай зүйл.  Авьяаслаг, дайчин, хөдөлмөрч зан чанар нь түүнийг дэлхийн тавцанд хүргэлээ.

     Дэлхийн медальтан Т.Энхжингийн сэтгэл баяр хөөрөөр цалгин, цалгиж, өөрийн дотоод хүч, авьяас чадвартай итгэх, итгэлээр бялхаж байгаа болов уу. Тэр өөрөөсөө илүү бяр, тэнхээтэй, хур их туршлагатай  бөх АНУ-ын Эллен Килтитэй маш ухаалаг, хараатай, сийрэгхэн барилдаан хийж ялалтыг авч “Бөмбөрцөгийн бөх” боллоо. Ахиад хэдэн жил Монголын нэрийг тахалж, дэлхийн дэвжээнд гялалзах юм бол гэдгийг нь таашгүй. Ирж яваа цагийн өнгөнд барилдах ийм нэг сайн бөх тодорч буйг харахад сайхан байна. Бяр нэмж, цол өгсөөд том амжилт руу дөтөлж явнаа “Алдар”-ын Т.Энхжин.

     Түүнийг чөлөөт бөх сонирхогчид  “Хөөрхөн ааштай, хөгжилтэй, “хөнгөн мааз” зантай, үргэлж л инээж явдаг нүүрний буянтай, нүдний цог нь гэрэлтсэн охин ингээд дэлхийн бөх боллоо. Хичээл зүтгэл, итгэл үнэмшил байхад хэний охин байх нь бусдад хамаагүйг мэдрүүлж яваа эгэл даруу, энгийн дөлгөөн охин. Хамаг сайхан бүхэн нь бүрэн цогцолсон сайхан охин шүү. Монголын нэрийг дэлхийн тавцанд олон удаа дуудуулж барилдана аа. Энэ бол түүний эхлэл, Т.Энхжин бол бидний бахдал, бахархал” хэмээн магтан бичиж байна.

    Монголын чөлөөт бөхийн холбооны удирдлагуудын  улс төржсөн, урагшгүй байдалтай байсан цаг үе улирч холджээ. Тус холбоог улс төрч, бизнесмэн, ах, дүү, хамаатан садан, ураг төрлийн хамаарал бүхий сэтгэлгүй, зүтгэлгүй хүмүүс улиг болтол удирдсан. Тэдгээр хүмүүсийн амьдрал сайжирсан. Эрэгтэй чөлөөт бөхийн тамирчдын ур чадвар, амжилт унаж, уруудсан билээ. Мөн багш, дасгалжуулагчдын хувийн амбиц, эв нэгдэлгүй байдал газар авч, нийгмийг хүртэл бухимдуулж байв.

    Харин Я.Содбаатар МЧБХ-ны ерөнхийлөгч болж, ерөнхий нарийн бичгийн даргаар нь Батсүхийн Мянганбаяр ажиллаж эхэлсэн нь сайн цагийн эхлэл байжээ. Тэдний сэтгэл,  хичээл зүтгэл, зөв менежментийг хэрэгжүүлж байгаагийн үр дүн бага, багаар боловч гарч байна. Монголын чөлөөт бөхийн холбоо олон жилийн хэрүүл, маргаан, тамирчдын амжилт нь буурсан он жилүүдийг ардаа орхисон байгаа нь сайн хэрэг. Монголын чөлөөт бөхөд хөгжлийн гэрэл гэгээ тусаад эхэлсэн байна.  Чөлөөт бөхчүүдийн хийморь сэргэж, өнгөтэй байна шүү.