Чөлөөт бөхийн насанд хүрэгчдийн дэлхийн аварга шалгаруулах тэмцээн Хорват Улсын Загреб хотод үргэлжилж байна. “Загреб-2025” ДАШТ-ий эмэгтэйчүүдийн 65 кг-ын жинд  Азийн аварга шалгаруулах тэмцээний хошой мөнгөн медальт, Үндэсний шигшээ баг, “Алдар” спорт хорооны тамирчин, ОУХМ Түвшинжаргалын Энхжин хүрэл медалийн төлөө барилдлаа.

    Түүний өрсөлдөгч нь ДАШТ-ий мөнгө, хүрэл медальт, Пан Америкийн хошой аварга АНУ-ын Эллен Килти байв. Тун тэнцүүхэн өрнөсөн энэхүү барилдаанд Т.Энхжин 4:2-оор илүүрхэж, Монголын багийн гурав дахь медалийн эзэн боллоо. Өмнө өдрүүдэд ДАШТ-ээс эрэгтэйчүүдийн 70 кг-д Т.Тулга мөнгө, эмэгтэйчүүдийн 59 кг-д Т.Алтжин хүрэл медаль хүртээд байсан билээ.