Боловсрол, шинжлэх ухааны сайд Л.Энх-амгалан гадаад болон дотоодод суралцдаг оюутнуудад олгодог зээлийн мэдээлэл ил тод байх ёстой гэж үзэн, Оюутны тэтгэлгийн санг нээлттэй байлгах зарчим баримтална гэдгээ илэрхийллээ. Түүнчлэн АНУ-ын дотоодын тарифаар суралцуулах магистр, бакалаврын төлбөрийг 20 мянга орчим ам.доллараар багасгах эхний алхам хийгдэж буй талаар өөрийн албан ёсны цахим хуудсаар дамжуулан мэдээлсэн юм.

Тэрбээр “Боловсрол, шинжлэх ухааны яам гадаадад болон дотоодод суралцдаг оюутнуудад олгодог зээлийн мэдээллийг ил тод болгох ёстой юм байна. Саяхан нэг хүн холбогдож “10 мянган ам.доллар өгвөл гадаадын тэтгэлэгт оруулаад өгнө” гэж хэлдэг талаар ярилаа. Ийм асуудал байгаа бол тэр хүний овог нэр, албан тушаал хаягийг надад хэлээрэй. Өргөдлөө надад хаяглаж явуулаарай.

Боловсролын салбарт байгаа авилгыг энэ мэтчилэн арилгахгүй бол сонсож, дуулаагүй их юм байдаг бололтой

Ийм хүн манай яаманд ажиллаж байгаа бол ажлыг нь аваад явуулна. Авилгатай тэмцэх газраар шалгуулъя. Боловсролын салбарт байгаа авилгыг энэ мэтчилэн арилгахгүй бол сонсож, дуулаагүй их юм байдаг бололтой. Цаашид Оюутны тэтгэлгийн санг нээлттэй байлгах зарчим баримтална” гэлээ.

Манай Улс гадаадад суралцаж байгаа оюутнуудад гурван төрлийн зээл олгодог. Дэлхийн шилдэг их, дээд сургуульд тэнцсэн оюутнууддаа 2010-2020 онд 420 мянган оюутанд зээл олгож, төрөөс 880 тэрбум төгрөг зарцуулжээ. Зөвхөн 2021 онд гадаадад суралцдаг оюутнуудад зориулсан зээлийн хэмжээ 5.8 тэрбум, магистр, докторын сургалтын 46 оюутанд 2.7 тэрбум төгрөг зарцуулсан байна.