Монгол Улсын Ерөнхийлөгчийн сонгуулийн тухай хуульд ээлжит сонгуулийн жилийн гуравдугаар сарын 1-ний өдрөөс өмнө аудитын байгууллагаас сонгуулийн зардлын дээд хэмжээг тогтооно хэмээн заасан байдаг. Тэгвэл Үндэсний аудитын газраас 2021 оны Монгол Улсын Ерөнхийлөгчийн ээлжит сонгуулийн зардлын дээд хэмжээг  8.1 тэрбум төгрөгөөр тогтоожээ.

Үндэсний аудитын дөрөвдүгээр газрын дарга Я.Самбууням "Өмнөх сонгуульд нам, эвслээс болон нэр дэвшигчээс гэсэн хоёр зардлын дээд хэмжээ тогтоож байсан. Ерөнхийлөгчийн ээлжит сонгуулийн зардлын дээд хэмжээг 2013 онд 8.1,  2017 онд 10.7 тэрбум төгрөгөөр тогтоож байсан. Тэгвэл 2021 оны Ерөнхийлөгчийн ээлжит сонгуулийн зардлын дээд хэмжээг 8.1 тэрбум төгрөгөөр тогтоож байна. Төрийн аудитын байгууллага энэхүү зардлын дээд хэмжээг тогтоохдоо холбогдох хуульд заасны дагуу нутаг дэвсгэрийн хэмжээ, байршил, өрхийн болон сонгогчийн тоо зэрэг шаардлагыг харгалзсан” гэв.