Гэр бүл, хөдөлмөр нийгмийн хамгааллын сайд Т.Аубакир өнөөдөр багш нарын төлөөлөлтэй уулзсан. Энэ талаар МБШУҮЭХ-ын дарга З.Цогтгэрэл "Маргаашнаас зөвшилцөлд хүрье, тоонуудаа нийлүүлье гэдэг асуудлыг тавьж байна. Бид 2026 оны нэгдүгээр сарын 1-нээс багш нарын цалинг 3.5 сая хүргэх санал тавьж байгаа. Харин хэзээнээс нэмэх боломжтойг тооцоолж, хоёр талаасаа уулзаад, гарын үсэг зурснаар энэ асуудал шийдвэрлэгдэх байх гэж бодож байна. Өмнө нь төсөвт нэг ч төгрөг байхгүй гэж байсан бол өнөөдөр 20,30 хувь гээд гарч ирж байгаа нь сайшаалтай. Цаашдаа бидний цалин 70-аас дээш хувь нэмэгдэж байж энэ түвшинд хүрэхээр байгаа гэдгийг та бүхэн мэдэж байгаа байх. Төсвийн орлого бүрдэхгүй байна гэдэг асуудал биднийх биш. Энэ бол УИХ, Засгийн газрын ажил. Далд эдийн засгаа нээлттэй шилэн болгож, эдгээр асуудлаа цэгцэлж, боловсролын салбарынхаа цалин хөлс, нийгмийн асуудлыг шийдээч гэж хэлмээр байна. Бид ямар ч байсан тавьж байгаа санал маань 2026 оны төсөвт тустал нь энэхүү тэмцэл хөдөлгөөнөө үргэлжлүүлнэ" гэв.