УИХ-ын зарим гишүүн цаг үеийн асуудлаар мэдээлэл хийж байна. Энэ үеэр УИХ-ын гишүүн Ц.Сандаг-Очир "П.Сайнзориг нарын 54 гишүүн Монгол Улсын Ерөнхий сайдыг огцруулах бичгийг албан ёсоор гардуулж өгснөөс хойш өнөөдөр ес дэх хоног дээрээ явж байна. Үндсэн хуульд заасны дагуу гурван хоногийн дараа хэлэлцэж, 10 хоногт багтааж шийдвэрлэх хуулийн заалттай. Энэ хугацаанд Төрийн байгуулалтын байнгын хороонд гурав дахь удаа хуралдаж, эцсийн байдлаар санал хураалтаа шийдсэн. УИХ-ын чуулганы хуралдааны Дэгийн тухай хуулийн 101.2-т Төрийн байгуулалтын Байнгын хороонд Ерөнхий сайдыг огцруулах саналыг хуралдаанаараа хэлэлцэж, санал дүгнэлт гарган нэгдсэн хуралдаанд танилцуулна. Тус хуулийн 101.3-т нэгдсэн хуралдаанд Байнгын хорооны санал дүгнэлтийг сонсож, ил санал хураалт явуулна. Энэ бүх процесс Дэгийн тухай хуульд заасны дагуу явагдаж, өнөөдрийн Байнгын хорооны Ерөнхий сайдыг огцруулах асуудал дуусаж байгаа. Ингээд Байнгын хорооноос гарсан санал дүгнэлтээ нэгдсэн чуулганд танилцуулна. Цаашдаа Ерөнхий сайдыг огцруулах асуудал их хурлын нийт гишүүдийн асуудал болж ирнэ. УИХ-ын 12 гишүүн Ерөнхий сайдыг огцруулах асуудлыг эцэслэн хэлэлцэх эрх нь байгаа" гэв.