Соёл, спорт, аялал жуулчлал, залуучуудын яам, НҮБ-ын Хүн амын сантай хамтран 2024 онд “Монголын залуучуудын нөхцөл байдлын шинжилгээний тайлан" хийсэн. Тэгвэл уг тайланг танилцуулах арга хэмжээг өнөөдөр Төрийн ордонд зохион байгууллаа.

     Уг тайлан илтгэлтэй холбоотой Соёл, спорт, аялал жуулчлал, залуучууд сайдын ажлын хэсгийн дарга бөгөөд сайдын ахлах зөвлөх С.Оюунбилэгээс дараах тодруулгыг авлаа.

        -НҮБ-ын Хүн амын сантай хамтран Монголын залуучуудын нөхцөл байдлын шинжилгээ судалгааг хийжээ. Уг тайлангийн ач холбогдол нь юу байв?

       - НҮБ-ын Хүн амын санд бид юун түрүүнд талархал илэрхийлж байна. Олон жил монгол залуучуудын нөхцөл байдлыг судлан, анализ хийж, цаашид төрийн бодлого шийдвэрт хэрэгжүүлэх маш чухал судалгааг гаргаж өгсөн. 2024 оны сонгуулийн үр дүнгийн дараа Засгийн газрын бүрэлдэхүүнийг шинэчлэн зохион байгуулж, Соёл, спорт, аялал жуулчлал, залуучуудын яамыг байгуулсан. Энэ чиглэлээр өнгөрсөн найман сарын хугацаанд үйл ажиллагаагаа чиглүүлж, нөхцөл байдлын дүн шинжилгээг хийж, хуулийн шинэчилсэн найруулгад өгөх саналуудаа боловсруулсан. Улмаар дүн шинжилгээг орон даяар хэлэлцүүлэх ажлыг эхлүүлж байна.

     -Тайлан судалгааны үр дүнд ямар өөрчлөлт гарах вэ?

    -Монгол Улсыг долоон бүс нутгаар хөгжүүлэх төлөвлөгөө гарсан. Бүс нутаг бүрд амьдарч байгаа залуучуудын амьдрлын хэв маяг нь өөр, өөр өөрийн гэсэн онцлог соёлтой залуучуудын хэрэгцээ шаардлага нь хүртэл өөр байгаа юм. Нийтээрээ залуучуудынхаа асуудлыг 18-35 гээд харчихаж байгаа нь өрөөсгөл болж байгаа юм. Нэг ёсондоо 18 настай залуу, 35 настай хоёр залуугийн хэрэгцээ шаардлага нь тус бүр өөр байна шүү дээ. Тэгэхээр бид үе үеэр нь бүс нутгийн онцлогоор нь авч хэлэлцэх шаардлага байна. Мөн залуусын дундах цахим хэрэглээ өсөж байна. Цахим ертөнцөөр нь дамжуулж, төрийн бодлогыг яаж хүргэх вэ, оролцоог нь хэрхэн хангах вэ гэдэг нь чиг үүрэг манай яаманд ирсэн.

       Үүн дээр залуусын боловсрол, эрүүл мэнд, хөдөлмөр эрхлэлтийн гээд олон асуудлыг ярьж байгаа. Манай хүн амын 49 хувь нь залуус. Гэтэл хүн амынхаа дийлэнх хувийг нь хөдөлмөр эрхлэлтээр хангаж чадахгүй, залуусынхаа нөөц боломжийг бүрэн ашиглаж чадахгүй байна. Залуус хөдөлмөр эрхлэх боломжоор хангагдахгүй байгаа учраас эдийн засгийн хэрэгцээгээ хангаж чадахгүй байна. Тиймээс бид цаашид залуусын асуудлыг ганцхан яаманд хариуцуулах бус, салбар салбарын уялдаа холбоог хангах шаардлага байна.

       -НҮБ-ын Хүн амын сангаас гаргасан энэ тайлангийн үр дүнг цаашид төрийн бодлоготой хэрхэн уялдуулах боломжтой байна вэ?

     -Малчин залуусаас маш тодорхой шаардлага тавьж байгаа. Уламжлалт нүүдлийн соёлоо хангахын  зэрэгцээ хамтдаа хөгжмөөр байна, хөгжих эрхийг хангаж өгөөч гэдэг л хэрэгцээ, шаардлага тавьж байгаа. Тиймээс “Малчин залуус” хөтөлбөрийг хэрэгжүүлэхээр болсон. Энэ хөтөлбөрийн хэрэгжүүлэхэд бүх төвшний Засаг дарга, орон нутгийн удирдлагууд хамтрахаар болсон. Ийм хамтын ажиллагааны маш том стратеги төлөвлөгөө хэрэгжүүлэхээр болж байна. Үүнийгээ бүс орон нутгийн залуусын дунд хэлэлцүүлсний дараа Монгол Улсын Шинэ сэргэлтийн бодлого, дунд хугацааны бодлогын бичиг баримтыг эрх зүйн баримт бичиг болгоод Эдийн засгийн хөгжлийн яаманд өгөхөөр бэлдэж байна.