Хэлснээ хэрэгжүүлж чадахгүй юм бол ажлаа өгнө үү, Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нар аа

2021-01-05, 1197

Бид уг нь маргааш өглөө 06:00 цагт хөл хорионоос гарах байлаа. Гэвч өчигдөр Засгийн газрын ээлжит бусаар хуралдаж, хөл хориог дөрөв хоногоор сунгасан. Ингэснээр бид өнөөдрөөс хойш дахин зургаа хоног хөл хорионд байхаар боллоо. Одоогийн байдлаар Улаанбаатар хотын хэмжээнд эх үүсвэр нь тодорхойгүй коронавирусийн хоёр голомт байгаа бөгөөд хөл хориог сунгасан дөрөв хоногт багтаан дээрх хоёр голомтыг хумина гэж Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нар мэдэгдээд байна. Гэхдээ хөл хорионы хугацаа дөрөв хоногоор хязгаарлагдахгүй бөгөөд шинэ голомт нэмэгдвэл дахиад сунгана гэдгээ ч мөн мэдэгдсэн.

Тэгвэл цар тахлыг хөл хорионы дөч гаруй хоногт хумиж авч чадаагүй Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нар дөрөвхөн хоногт багтаан хумиж авч чадахгүй гэж олон нийт үзэж байна. Товчхондоо, шинэ голомт нэмэгдсэн ч бай, үгүй ч бай хөл хорио ирэх 11-нээс хойш дахин сунгагдах нь тодорхой гэх таамаг нийгэмд бий болжээ.

Олон нийтийн энэ таамаг зүгээр ч нэг хоосон хардлагаар бус өнгөрсөн хугацаанд ил болсон тэдний алдаатай арга барилаас үндэслэжээ. Тухайлбал, Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нарыг цар тахлыг голомтуудыг хумь, нэмж тархаахгүй бай гэж Засгийн газраас 40 гаруй хоног хөл хорио тогтоож өгсөн. Гэвч тэд ард түмнийг аюулаас хамгаалахын төлөө бус алдар нэр, ашиг хонжооны төлөөх тэмцэл өрнүүлж, төрийн байгууллагуудыг удирдлага зохион байгуулалтаар дутааж, нийгмийг бүхэлд нь назгайруулсан. Тиймээс тэд цаашид ч цар тахлыг хумиж авч чадахгүй гэж ард түмэн үзэж байгаа юм.

Тэгвэл тэд өнгөрсөн хугацаанд хэрхэн ажилласныг товчхон сануулъя.

Монгол Улс өнгөрсөн оны арваннэгдүгээр сарын 12-ны 06:00 цагт анх удаа Бүх нийтийн бэлэн байдлын зэрэгт шилжиж, ард иргэд, аж ахуйн нэгжүүдээ хатуу хөл хорионы дэглэмд оруулсан байдаг. Тэр үед коронавирусийн дотоодод илэрсэн тохиолдол гурав, зөөвөрлөгдөж орж ирсэн тохиолдол 384 байлаа. Улмаар хатуу хөл хориог арваннэгдүгээр сарын 15-нд 14 хоногоор, арваннэгдүгээр сарын 29-нд 10 хоногоор, арванхоёрдугаар сарын 9-нд гурав хоногоор тус тус сунгаж байсан. Одоо санахад, хөл хорионы тэр өдрүүдэд цагдаа, сонсогч, онцгой байдлын алба хаагчид автозамуудын уулзвар, хотын булан тохой бүрт шахуу зогсож, хатуу хөл хорионы дэглэмийг ягштал мөрдүүлж байв. Тэд өлсөж цангах, даарч хөрөхийг үл ажран 24 цагаар ээлжлэн жижүүрлэж, цасан дээр, цонхон тушаа “Гэртээ бай” хэмээн бичицгээж, бүр гудамжинд бүжиглэж, ард иргэд ч “Түмнээ хамгаалдаг төртэй байх сайхан юм” хэмээн Засгийн газрын тэргүүн У.Хүрэлсүх, Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан, Нийслэлийн онцгой комиссын дарга Д.Сумъяабазар нарт хайр зарлан, хайлж урсаж байлаа. Ингээд гурван удаа сунгагдсан, бүтэн сарын хөл хорио арванхоёрдугаар сарын 14-ны 06:00 цагт цуцлагдаж, нийт 52 салбарын 21 мянга гаруй аж ахуйн нэгж үүдээ нээж, 280 гаруй мянган иргэн ажилдаа явж эхэлсэн. Тэр үед нийт халдварын тохиолдол 500 гаруйгаар нэмэгдэж, нийт 912 болсон байв.

Гэсэн ч бүх тохиолдол эмнэлгийн тусгаарлалтад байгаа, нэмээд хөл хорио цуцлагдсан гэж төр засгаас зарласан учраас аюулт цар тахлын ард гарч, айдгаа авдартаа хийсэн мэтээр дээр, дооргүй сэтгэцгээж, энх цагтай золголоо гэж баярласан.

Гэвч тавхан хоногийн дараа Засгийн газар дахин хуралдаж, Баянзүрх дүүргийн нэгдсэн эмнэлэг цар тахлын голомт болж, өвчтөнүүдийг эдгээдэг газар биш халдвар тараадаг газар болж хувирсан учраас арванхоёрдугаар сарын 23-ны 06:00 цагаас эхлэн дахин 14 хоногийн хөл хорио тогтоох шийдвэр гаргасан. Эхний хөл хорионы бүтэн сарын хугацаанд УОК, ЭМЯ халдварын голомтуудыг хумих чиглэлээр дорвитой ажил хийгээгүй, харин ч эрүүл мэндийн байгууллагуудад халдвар хамгааллын дэглэм дутуу сахиулж байсан нь ил болсон. Хоржоонтой нь арванхоёрдугаар сарын 23-нд буюу хоёр дахь удаагаа хөл хорио тогтоосон эхний өдөр 57 тохиолдол шинээр нэмэгдэж, нийт батлагдсан тохиолдол 1063 болсон байдаг.

Хоёр дахь удаагийн хөл хорио өмнөхөөсөө илүү хатуу, нарийн зохион байгуулалттай хэрэгжинэ гэж төсөөлж байсан ч хатуу хөл хорио бүү хэл сул хөл хорио ч хэрэгжсэнгүй. Эрүүл мэндийн сайд Т.Мөнхсайхан ХӨСҮТ-ийн захирал Д.Нямхүүтэйгээ “зодолдож”, яам дотроос элдэв халаа сэлгээ, тендерийн будлианы “шуум” дуулдах болов. Улсын онцгой комисс нь Нийслэлийн онцгой комиссоо удирдлагын түвшинд дийлэхээ больж, дур мэдэн зөрүүтэй шийдвэр гаргадаг том толгойтой хурган дарга олшров. Дээдүүл нь энэ мэтээр суудлаа олохгүй байгаагаас болж доодуул нь гүйдлээ олохоо больж, гудамж талбайд ч, халдвар хамгааллыг дээд зэргээр сахих ёстой эмнэлгүүдэд ч хяналт эрс сулрах нь тэр.

Хяналт суларсны гороор ХӨСҮТ, Цэргийн төв эмнэлэг, Хавдар судлалын үндэсний төв зэрэг үндэсний хэмжээний том эмнэлгүүд нь шил дараалан голомт болж хувирлаа. Олон нийтийн газраар хөл хөдөлгөөн эрс нэмэгдэж, нэг нэгнийхээрээ хэсэж, архидан согтуурах байдал хавтгайрав. Мөн автомашинууд түгжирч, бялуунаас эхлээд дуртай газраа дугаарладаг болж эхэлсэн. Ингэж хэт дээд, доодгүй хэт назгайрсны балгаар эх үүсвэр нь тодорхой тохиолдлууд борооны дараах мөөг шиг олширч, орон сууцны хотхон, хорооллууд шил дараалан тусгаарлагдах боллоо.

Тэд хөл хориог хатуу хэрэгжүүлээгүй, хэт назгайруулсны хамгийн том жишээ нь “Тэнүүн огоо”, “Мөнххада” компанийн ажилчид анх хаанаас халдвар авсан нь тодорхойгүй байгаа бөгөөд бөөндөө оргилуун дарс ууж, шинэ жил тэмдэглэж, улмаар халдварыг дотроо тархаасан нь ч ил болоод байна.

Ийм маягийн хөл хорио цаашид үргэлжилбэл халдварын голомтууд хумигдахгүй, эсрэгээрээ ард түмний амьдрал улам л доройтох болно. Уг нь УОК, ЭМЯ хөл хорионы хугацаанд эрчимтэй ажилласан бол цар тахлыг бүрэн хумиж авах хангалттай хугацаа байсан. Бүтэн 40 гаруй хоног ард түмэн ажилгүй, орлогогүй гэртээ сууж, цар тахлыг дарж авахад нь чадлаараа тусласан. Гэвч тэд халдварыг хумихад биш, албан тушаал, хөрөнгө мөнгөний хэрүүл хийж явсаар хөл хорионы хугацааг өнгөрүүлсэн. Тэгсэн атлаа дахиад хөл хориог сунгана гэж яриад сууж байх нь шударга бус байна. Харин энэ удаад Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нар хэлсэн үгэндээ хүрч, дөрөв хоногт багтаан халдвараа хумиж авч чадахгүй бол хариуцлагаа хүлээ. Ажлаа мэддэг, зоригтой шийдвэр гаргадаг, гаргасан шийдвэрээ хэрэгжүүлж чаддаг хүн цар тахал газар аваад буй энэ хүнд цаг үед Монголын төрд ажиллах хэрэгтэй болохоос эргэж буцсан шийдвэртэй, элдэв янзын хэрүүл, тэмцэлээ дарж, намжааж чаддаггүй дарга нар хэрэггүй билээ. Ядаж л хөл хориогоо хөл хорио шиг хэрэгжүүлж чадах хүн үгүйлэгдэж байна.

Хэлснээ хэрэгжүүлж чадахгүй юм бол ажлаа өгнө үү, Улсын онцгой комиссын дарга Я.Содбаатар, Эрүүл мэндийн сайд Т.Мөнхсайхан нар аа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 3

Сэтгэгдэл үлдээсэн: 2021-01-06 17:15:15

Оюун: Мөнхсайхан гэж 1 пээдгэр хүн их хурал дээр ч, хаана ч аль хуралдаан дээр тогтвортой сууж чалахгүй, эхлээд удаагүй байхад нь хаяад гараад явчих юм, ямар айх ичихээ мэддэггүй хүх бэ
Сэтгэгдэл үлдээсэн: 2021-01-05 23:19:27

иргэн: Олон жил халдвартын эмчээр ажилласан Нямхуу эмчийн идэвхи чармайлтыг унтраагаад хаячихлаа. монго нь бгаа цагт эмнэлгийн хананд будаг турхэхийг хэн ч чадна. Монхсайхныг магтаад бх юм алга. Огцорсон дээр. Содбаатар бас огцор. Ажлын саадууд
Сэтгэгдэл үлдээсэн: 2021-01-05 20:14:52

зочин: Энэ Мөнхсайхан сайд үндсэн ажилаа хийхгүй, ажиллаад хэвшээд сурчихсан мэргэжлийн эмч нарыг үймүүлээд байхын, Ямар гээчийн бодолтой хүн бэ. Гол анхаарлаа вирусыг устгахын төлөө тэмцээсэй. Үнэндээ ажиллаж чадахгүй байна шүү. Та өөрөө садаа бололгүй огцорвол яасын бэ. Үнэндээ хариуцлагагүй ажиллаж байна